काठमाडौं । रौतहटको चन्द्रपुर नगरपालिका-२ मा बसले अटो रिक्सालाई ठक्कर दिँदा तीन जनाको मृत्यु भएको छ ।
काठमाडौंबाट सर्लाहीका लागि छुटेको बागमती प्रदेश ०३-००१ ख २०१ नम्बरको बसले पूर्वपश्चिम राजमार्गको लच्कामा प्रदेश २-०२-००१ ह २१०९ नम्बरको अटो रिक्सालाई ठक्कर दिँदा तीन जनाको मृत्यु भएको हो । मृतक तीनैजना अटो रिक्सामा सवार थिए ।
दुर्घटनामा परि मृत्यु हुनेमा सर्लाही-२ सोल्टीका प्रेम ठाडामगर, ढकबहादुर लुंगेली र अटो चालक रवि मगर रहेको प्रहरीले जनाएको छ ।
दुर्घटनामा लुंगेलीकी श्रीमती सविना लुंगेली घाइते भएकी छन् । उनको चन्द्रपुर अस्पतालमा उपचार भइरहेको प्रहरीले जनाएको छ ।
बसका चालक चन्दनकुमार साहलाई नियन्त्रणमा लिएर आवश्यक अनुसन्धान कार्य भइरहेको इलाका प्रहरी कार्यालय चन्द्रपुरले जानकारी दिएको छ ।
प्रतिक्रिया