प्रदीप गिरीको स्वास्थ्य अवस्था बुझ्न प्रचण्ड मेडिसिटीमा

काठमाडौं । स्वास्थ्य अवस्था बिग्रीएपछि ललितपुरस्थित मेडिसिटी अस्पतालमा उपचाररत कांग्रेस नेता प्रदीप गिरीको स्वास्थ्य अवस्था बुझ्न नेकपा माओवादी केन्द्रका अध्यक्ष पुष्पकमल दाहाल प्रचण्ड बिहानै अस्पताल पुगेका छन् ।

बिहानै अस्पताल पुगेका माओवादी अध्यक्ष प्रचण्डलाई चिकित्सकहरुले गिरीको स्वास्थ्य अवस्था स्थिर रहेको जानकारी दिएका थिए । गिरीलाई भेन्टिलेटरमा राखेर उपचार गरिए पनि स्वास्थ्यमा सुधार आउन नसकेको चिकित्सकले बताएका थिए।

स्वास्थ्यमा समस्या देखिएपछि एक साताभन्दा लामो समयदेखि गिरी ललितपुरस्थित मेडिसिटी अस्पतालमा उपचारत छन्। उनी घाँटीको क्यान्सरसम्‍बन्धी समस्याबाट पीडित छन्। भारतको मुम्बईमा लामो समय उपचार गरेर फर्केका गिरीलाई समस्या बल्झेपछि अस्पताल भर्ना गरिएको हो । पछिल्लो केही दिनयता गिरीलाई निमोनियाले समेत च्यापेको बताइएको छ ।