खजुरा । नेपाली कम्युनिष्ट आन्दोलनका पुराना निष्ठावान नेता सत्यदेव भट्टराईको निधन भएको छ । सुर्खेत, बाँके र बर्दियामा कम्युनिष्ट आन्दोलनको बिउ छर्ने नेताकारुपमा परिचित भट्टराईको नेपालगन्ज मेडिकल कलेज कोहलपुरमा उपचारका क्रममा मृत्यु भएको हो ।
७९ वर्षको उमेरमा भट्टराईको निधन भएको पारिवारिक सदस्यहरुले पुष्टि गरेका छन् । २०२३ सालमा भारतको बनारसमा बलराम उपाध्यायको हातबाट कम्युनिष्ट पार्टीको सदस्यता प्राप्त गरेका भट्टराईले पुस्पलाल समुहमा बसेर राजनीति प्रारम्भ गरेका थिए ।
सुर्खेतको सिम्ता क्षेत्रमा कम्युनिष्ट पार्टीको थालनी गर्दै पुजर्वास कम्पनीको जग्गा वितरणसँगै उनी २०२४ सालमा बाँके झरेका थिए । बाँकेमा पनि निरन्तर कम्युनिष्ट संगठन विस्तारमा क्रियाशिल उनको घरमा एमालेका तत्कालिन अध्यक्ष मनमोहन अधिकारीले आफ्नो मार्क्सवादी कालमा भूमिगत जीवन बिताएका थिए । जनमत संग्रहका बेला भट्टराई ५ महिना जेल समेत परेका थिए । पञ्चायती व्यवस्थाको विरोध गरेबापत तत्कालिन प्रधानमन्च कमल पोखरेलको सुराकीमा भट्टराईलाई पक्राउ गरिएको भट्टराईका समकक्षी राजनीतिक अगुवा डा. बाबुराम गौतमले बताए ।
४६ सालको जनआन्दोलनमा नेपालगन्जमा कडा सुरक्षालाई छिचोल्दै एक्लै कालो झण्डा देखाएबापत भट्टराई र बाँके सीतापुरका जङ्गबहादुर खत्रीलाई प्रहरीले पाशाविक यातना दिएको थियो ।
बनारस हिन्दु संस्कृत विश्व बिद्यालयबाट सन १९६४ को प्रवेशिका परीक्षका कलेजमा बोर्ड फष्ट भएका भट्टराई शिक्षा, कृषि र सहकारी अभियानका अभियन्ता पनि हुन् । चारपाते क्लव मार्फत युवालाई कृषिमा आकर्षण दिने शुरुवात गरेका उनले सहकारी आन्दोलन र कोहलपुर स्थित शितभण्डार स्थापनामा उल्लेख्य योगदान दिएका छन् ।
२ छोरा र १ छोरीका बावु भट्टराईको शव बाँकेको खजुरा गाँउपालिका २ के गाँउमा आज राखिने र भोलि बिहान दाहसस्कार गरिने पारिवारीक स्रोतले जनाएको छ ।
प्रतिक्रिया