भैरहवा । सियारी गाउपालिका अध्यक्ष थनेश्वर घिमिरेको घरमा बिष्फोटक पदार्थ राख्ने ३ जनालाई रुपन्देही प्रहरीले पक्राउ गरेको छ । अध्यक्ष घिमीरेको घरान बिष्फोटक पदार्थ राखेको आरोपमा घिमिरेकै चालक सहित तीन जनालाइ प्रहरीले पक्राउ गरेको हो ।
पक्राउ पर्नेमा अध्यक्ष घिमिरेका चालक रुपन्देही कोटहीमाई गाउपालिका वडा नम्बर ४ बस्ने २४ बर्षिय सुरज थारु, सियारी गाउपालिका वडा नम्बर ४ धमसर बस्ने २७ बर्षिय अब्दुल हाकिम खाँन र कोटहीमाई गाउपालिका वडा नम्बर ३ बस्ने २२ बर्षिय सुरज लोहार रहेका छन । प्रहरीले भैरहवामा आज पत्रकार सम्मेलन गर्दै पक्राउ परेकालार्इ सार्वजनिक गरेको हो ।
प्रहरीले दिएको विवरण अनुसार गत बैशाख १ गते सियारी गाउँपालिका वडा नम्बर ४ मा सियारी गाउँपालिकाको अध्यक्ष थानेश्वर घिमिरेको घरपछाडीको पर्खाल नजिकै फेला परेको विष्फोटक पदार्थलार्इ नेपाली सेनाको डिस्पोजल टोलीले डिस्पोज गरेको थियो । यस्तै असार १ गते बिहान सिद्धार्थनगर नगरपालिका वडा नम्बर ४ का भैरव प्रसाद कलवारको शिवम् ईम्पेक्सको (दाना फ्याक्ट्री गोदाम) कम्पाउण्डमा पर्खाल बाहिर कुकर बम बिष्फोट गराईएको थियो ।
सोही दिन मायादेवी गाउँपालिका वडा नम्बर ८ सिटी हस्पिटलको पछाडी रहेको खाली जग्गामा विष्फोटक पदार्थ (प्रेसर कुकर बम) बिष्फोट भएको थियो । सबै घटनामा यिनै तीन जनाको संलग्नता देखिएको रुपन्देही प्रहरी प्रमुख एसपी भरत बहादुर विश्वकर्माले जानकारी दिए ।
उक्राउ परेकाहरुले संगठित रुपमा फिरौती रकम माग गर्न घटना घटाएको एसपी विश्वकर्माले दाबी गरे। उनले घटनामा अन्यको पनि संलग्नता रहेको उल्लेख गर्दै उनिहरुको खोजीमा प्रहरी परिचालन गरिएको बताए ।
प्रहरीले पक्राउ परेकाहरुबाट ५ थान मोबाइल र २ वटा मोटरसाइकल समेत बरामद गरेको छ । उनिहरुमाथी बिष्फोटक पदार्थ सम्बन्धि कसुरमा मुद्दा दर्ता गरिएको प्रहरीले जानकारी दिएको छ ।
पत्रकार सम्मेलनमा बोल्दै लुम्बिनी प्रदेश प्रमुख प्रहरी नायब महानिरिक्षक उमेशराज जोशीले रुपन्देही प्रहरीको ठूलो सफलता प्राप्त गरेको बताए । संगठित रुपमा फिरौती माग्ने गिरोहलाई नियन्त्रणमा लिन प्रहरी सफल भएको बताउँदै डीआईजी जोशीले रुपन्देहीमा अन्य जिल्लाबाट पनि प्रहरी ल्याएर सुरक्षा कडा बनाएको जानकारी दिए ।
प्रतिक्रिया