सत्ता गठबन्धनबीच राष्ट्रियसभाको सिट बाँडफाँटबारे अन्तिम निर्णय गर्न बैठक बस्दै

काठमाडौं । राष्ट्रियसभा निर्वाचनका लागि सिटहरुको बाँडफाँटबारे निर्णय गर्न सत्तारुढ गठबन्धनका दलहरु आज (आइतबार) पनि छलफल गर्दैछन् ।

यसअघि शनिबार अबेरसम्म बसेको गठबन्धनको बैठकमा दलहरुले राष्ट्रियसभा सिट आ-आफ्नो दाबी गरेका थिए । शनिबार बेलुकी प्रधानमन्त्रीको सरकारी निवास बालुवाटारमा बसेको बैठकमा केही दल असन्तुष्ट बनेका थिए ।

यद्यपि, शनिबार राति अबेरसम्म तीन दलले राष्ट्रियसभा निर्वाचनका लागि सहमतिको अन्तिम ड्राफ्ट तयार गरेका छन् । नेकपा (एकीकृत समाजवादी)का अध्यक्ष माधवकुमार नेपाल असन्तुष्ट बनेर हिँडे पनि तीन दलले चार प्रदेशमा आपसी भागबण्डा गरेका हुन् ।

माधव नेपालले तीन सिटमा दाबी गरेका छन् । तर कांग्रेस र माओवादीले दुई सिटमात्र दिन सकिने बताइरहेका छन् । आज बिहान माधव नेपाललाई राखेर सहमति गर्ने एक नेताले बताए ।

माघ ११ गते निर्वाचन हुने १९ सिटमध्ये नेपाली कांग्रेसले १० सिट, माओवादी केन्द्रले ६, नेकपा एकीकृत समाजवादीले २ र जनता समाजवादी पार्टीले १ सिट लिने भन्ने मोटामोटी सहमित भएको नेकपा माओवादी केन्द्रका उपमहासचिव वर्षमान पुनले जानकारी दिएका छन् ।

राष्ट्रिय सभामा आगामी फागुन २० गते राष्ट्रपतिबाट मनोनीत १ जनासहित २० जनाको पदावधि सकिँदै छ । पदावधि सकिनेमा एमालेबाट सबैभन्दा बढी ८ जना, कांग्रेसबाट ४ जना, माओवादी केन्द्रबाट ३ जना, एकीकृत समाजवादीबाट २ जना, जनता समाजवादी पार्टी ९जसपा० बाट १ जना, स्वतन्त्र १ जना, मनोनित (एमाले) १ जनाको पद रिक्त हुँदैछ ।

माघ ११ गते हुने निर्वाचनका लागि निर्वाचन आयोगले यसअघि नै निर्वाचन कार्यक्रम सार्वजनिक गरिसकेको छ । जसअनुसार आज (आइतबार) मतदाताहरुको अन्तिम नामावली प्रकाशन गरिनेछ। उम्मेदवारको मनोनयपत्र सोमबार दर्ता हुनेछ ।