नेपालगन्ज । नेपालगन्जको कोहलपुर-नेपालगन्ज सडक खण्डमा मात्र चालु आर्थिक वर्षको ६ महिनामा १६ जनाको सवारी दुर्घटनाबाट मृत्यु भएको छ । साउन देखि पुस महिनासम्मको तथ्याङ्क अनुसार ४६ वटा दुर्घटनाबाट १४ पुरुष र २ जना महिलाको मृत्यु भएको हो ।
जिल्ला ट्राफिक प्रहरी कार्यालय बाँकेले दिएको तथ्याङ्क अनुसार सो अवधिमा ट्रक र टेक्टर ७ वटा ठोक्कीएका छन् भने २ वटा माइक्रो बस, ५ वटा जिप/कार, १ वटा टेक्टर, २ वटा टेम्पो, २६ वटा मोटरसाईकल, २ वटा सायकल र १ अन्य दुर्घटना भएका छन् । दुर्घटनाबाट १४ पुरुष ४ महिला गम्भीर घाइते तथा १४ पुरुष १ महिला सामान्य घाइते भएका छन् ।
नेपालगन्ज–कोहलपुर सडकखण्ड खण्डमा अत्याधिक सवारी दुर्घटना हुन थालेपछि भने सवारी दुर्घटना न्यूनीकरण गर्ने उद्देश्यले सडक खण्डका विभिन्न ठाउँमा २५ वटा जेब्राक्रस बनाउन थालिएको छ । सडक डिभिजन कार्यालय नेपालगन्जको सहकार्यमा नेपालगन्ज कोहलपुर खण्डका विभिन्न २५ स्थानमा जेब्राक्रस र सेन्टर लाइनको निर्माण कार्य सुरु गरिएको हो ।
सडक डिभिजन कार्यालय नेपालगन्जसँगको सहकार्यमा नेपालगन्ज-कोहलपुरसम्मको विभिन्न २५ स्थानमा जेब्राक्रस र सेन्टर लाइनको निर्माण कार्य सुरु गरिएको जिल्ला ट्राफिक प्रहरी कार्यालय बाँकेले जनाएको छ । सडक डिभिजन कार्यालय नेपालगन्जको १२ लाख रुपियाँको लागतमा जेब्राक्रस बनाउन सुरु गरिएको जिल्ला ट्राफिक प्रहरी कार्यालय बाँकेका प्रमुख गोपीकृष्ण सुवेदीले बताए ।
उनले सवारी चालक र पैदल यात्रुले जथाभाबी सडक पार गर्दा दुर्घटनाको जोखिम बढ्ने गरेकाले जेब्राक्रसले दुर्घटना न्यूनीकरण गर्न निकै मद्दत पुग्ने विश्वास ब्यक्त गरे ।
दुर्घटना न्यूनीकरण र सवारी नियमनलाई प्रभावकारी बनाउन नेपालगन्ज, कोहलपुर सडकखण्डमा जेब्राक्रस निर्माण थालिएको सडक डिभिजन कार्यालय नेपालगन्जका प्रमुख नीरज शाक्यले बताए ।
प्रतिक्रिया