सर्वोच्चले खारेज गरेको जनयुद्ध दिवस रोल्पाको स्थानीय सरकारले मनाउँदै

नेपालगन्ज । संघीय सरकारले दिएको जनयुद्ध दिवसको सार्वजनिक बिदालाई सर्वोच्च अदालतले बदर गरिदिएपनि रोल्पाको माडी गाउँपालिकाले फागुन १ गते ‘जनयुद्ध’ दिवसको सार्वजनिक बिदा दिएको छ ।

माघ १७ गतेको गाउँकार्यपालिकाको बैठकको निर्णय अनुसार फागुन १ गते जनयुद्ध दिवसको अवसरमा भन्दै बिदा दिने निर्णय भएको पालिकाका प्रमुख प्रशासकीय अधिकृत युवराज परियारले सूचना मार्फत जानकारी गराएका छन् ।

उक्त दिन गाउँपालिका मातहतका सरकारी कार्यालय र शिक्षण संस्थाहरु बन्द रहने सूचनामा उल्लेख छ । उक्त गाउँपालिकामा गत स्थानीय चुनावमा माओवादी केन्द्रले जितेको थियो ।

सर्वोच्च अदालतले भने ‘जनयुद्ध’ दिवसमा बिदा दिने पुष्पकमल दाहाल प्रचण्ड नेतृत्वको सरकारले गत वर्ष गरेको निर्णय खारेज गरेको थियो ।

जनयुद्ध दिवसमा प्रचण्ड मन्त्रिपरिषदबाट बिदा दिने निर्णय गर्दै राजपत्रमा सूचना समेत प्रकाशित भएकोमा सर्वोच्चले संक्रमणलीन न्याय प्रभावित हुनसक्ने तथा द्वन्द्वपीडितहरुको भावना चोट पर्नसक्ने भन्दै ‘जनयुद्ध’ दिवसमा बिदा दिने निर्णय खारेज गरेको थियो ।