खजुरा । बाँकेको खजुरा गाउँपालिका वडा नम्बर १ को सैनिकगाउँमा नेपालका प्रथम शहिद क्याप्टेन लखन थापा मगरको पूर्ण कदको शालिक अनावरण गरिएको छ ।
सैनिक गाउँस्थित बहादुरपुर चोकमा शहीद लखन थापको शालिक अनावरण गरिएको हो । खजुरा गाउँपालिकाका अध्यक्ष डम्बरबहादुर बिक तुफान, उपाध्यक्ष मन्जु मल्ल तथा गाउँपालिकाका प्रमुख प्रशासकीय अधिकृत बसबहादुर रानाले संयुक्तरुपमा शालिकको अनावरण गरेका थिए ।
१४७औं लखन थापा मगर स्मृति दिवसका अवसरमा अनावरण गरिएको शहिद लखन थापा मगरको पूर्ण कदको शालिक साढे ६ फिट अग्लो छ भने तौल २०० केजी रहेको छ ।
अनावरण कार्यक्रममा बोलदै गाउँपालिकाका अध्यक्ष डम्बर बिक तुफानले शहिदले देखाएको मार्गमा हिँड्नुपर्ने भन्दै शहिदकै कारण आज हरेक नागरिकले स्वतन्त्र भएर बाच्न पाएको बताए ।
उनले समाज परिवर्तनका लागि बलिदान दिनेहरु भौतिक रुपमा नरहे पनि समाजमा सधैं बाँचिरहने् बताए । हाँसीहाँसी जीवन बलिदान गर्ने शहिदलाई सबैले सम्मान र आदर गर्नुपर्ने पनि उनले बताए ।
गाउँपालिकाकी उपाध्यक्ष मन्जु मल्ल, गाउँपालिकाका प्रमुख प्रशासकीय अधिकृत बसबहादुर राना, वडाध्यक्षहरु लगायतले बोलेका थिए ।
नेपाल मगर संघ खजुरा गाउँपालिकाका अध्यक्ष उज्ज्वल सिंह थापाको सभापतित्वमा आयोजना भएको शालिक अनावरण कार्यक्रमअघि लखन थापाको शालिकलाई बाजागाजासहित सैनिकगाउँका बिभिन्न टोलहरुमा परिक्रमा गराइएको थियो ।
प्रतिक्रिया