नेपालगन्ज । होटल व्यवसायी महासंघ बाँके नेपालगन्जको १९ औं बार्षिक साधारणसभा सम्पन्न भएको छ । साधारणसभाको उदघाटन गर्दै नेपालगन्ज उपमहानगरपालिका प्रमुख प्रशान्त विष्टले संघीयता पछि होटल व्यवसायलाई परेको असरलाई पर्यटक भित्र्याएर कम गर्न सकिने बताए ।
नगर प्रमुख विष्टले नेपालगन्जलाई धार्मिक पर्यटनको हव बनाउन सकिने बताए । उनले धार्मिक पर्यटनको प्रवद्र्धन गर्न अयोध्या र जनकपुरसँग जोड्ने प्रयास भैरहेको बताउँदै नेपालगन्जमै निर्माण भैरहेको १ सय ८ फिट अग्लो हनुमानको मूर्ति धार्मिक पर्यटक भित्र्याउने एउटा आकर्षण बन्न सक्ने बताए ।
कार्यक्रममा बोल्दै होटल व्यवसायी संघका लुम्बिनी प्रदेश अध्यक्ष भाष्कर काफ्लेले नेपालको अर्थतन्त्र बलियो बनाउन सबैभन्दा उर्वर क्षेत्र पर्यटन भएको बताए । उनले नेपालगन्जमा पर्यटकलाई स्वागत स्तरीय होटल संचालनमा रहेको उल्लेख गर्दै त्यसका लागि पर्यटक भित्रिने वातावरण भने सरकारले बताउनु पर्ने उल्लेख गरे ।
‘हामी सँग भएको पर्यटकीय क्षेत्रको प्रवद्र्धन गरेर सबैका लागि बलियो आर्थिक स्रोत बनाउन सकिन्छ ।’ उनले भने ।
होटल व्यवसायी संघका केन्द्रीय सदस्य भीमलाल कँडेलले होटल व्यवसायीका लागि क्षमता अभिवृद्धिका लागि स्थानीय तहबाट तालिम सञ्चालन गरिदिन आग्रह गरे ।
होटल व्यवसायी संघ बाँकेका अध्यक्ष रंग बहादुर खड्काको अध्यक्षतामा भएको बार्षिक साधारणसभामा संघ आवद्ध अग्रज व्यवसायी, टोल समिति, कार्यसमितिका पदाधिकारीलाई सम्मान गरिएको थियो ।
प्रतिक्रिया