बिना भन्सार भारतबाट नेपालगन्ज भित्रिएको बोलेरो भरीको सामान प्रहरीबाट बरामद

नेपालगन्ज । बाँके प्रहरीले नेपालगन्ज भन्सार पार गरेर नेपालगन्ज बसपार्क पुर्याइएको ठूलो मात्रामा चिनी र खाने तेल बरामद गरेको छ । बोलेरो गाडीमा लोड गरिएको एक हजार ६ सय किलो चिनी र ८४ पेटी खाने तेलसहित बोलेरो गाडी प्रहरीले नियन्त्रणमा लिएको हो ।

लु १ च ६९७० नम्बरको बोलेरो गाडीमा अवैध रुपमा ल्याइएको चिनी र तेल भेटिएपछि प्रहरीले गाडी, चालक भीमबहादुर डिसी, चिनी र तेल भन्सार कार्यालय, नेपालगन्ज मा पठाइएको प्रहरीले जनाएको छ ।

प्रहरीका अनुसार चिनि १ हजार ६०० के.जि. प्रति के.जि. ६० को दरले मुल्य रु.९६ हजार, भारतीय स्वाड ब्राण्डको खाने तेल ८४ पेटी प्रति पेटी १ हजार ४०० को दरले मुल्य रु. १ लाख ७ हजार ६०० र लु १ च ६९७० नम्बरको अन्दाजी मुल्य रु ७ लाख पर्ने बोलेरो गाडी गरी अन्दाजी मुल्य जम्मा रू ९ लाख १३ हजार ६०० बराबरको सामान भन्सारमा बुझाइएको हो ।

नेपालगन्जको बसपार्क नजिकबाट बिहान उक्त सामान प्रहरीले बरामद गरेको थियो ।