डा. चापागाई बने पहिलो ठुलो दानकर्ता, बैकुण्ठधामका लागि ५ लाख ५५ हजार ५५५ रुपैयाँ प्रदान

नेपालगन्ज । बाँकेको सिधनियाघाटमा प्रस्ताव गरिएको बैकण्ठधाम निर्माणका लागि आर्थिक सहयोग प्राप्तहुने क्रम सुरु भएको छ । बैकुण्ठधाम निर्माणका लागि आर्थिक संकलन प्रयोजनको उद्देश्यले कार्तिक महिनामा धार्मिक महोत्सवको तयारीमा जुटेको बैकुण्ठधाम मुल समितिलाई पहिलो ठुलो धनराशी सहयोग गर्नेमा भेरी अस्पतालका चिकित्सक डा. बद्री चापागाईको नाम दर्ज भएको छ ।

भेरी अस्पताल नेपालगन्जमा कार्यरत प्रमुख कन्सल्टेन्ट चर्म रोग विशेषज्ञ डा. चापागाईले पहिलो दान स्वरुप ५ लाख ५५ हजार ५ सय ५५ रुपैयाँ प्रदान गरेका छन् । पितृश्राद्धको पहिलो दिन डा. चापागाईले आफ्ना हजुरबुबा स्व. हितलाल चपाईको स्मृतिमा ५ लाख ५५ हजार ५ सय ५५ रुपैयाँ दान गरेका हुन् ।

ब्यवस्थित दाहसंस्कार स्थल नभएका कारण वर्षौदेखि समस्या भोगिरहेका बाँके र यस आसपासको स्थानीयबासीको सहजताका लागि राप्ती नदी किनारको सिधनियाघाटमा बैकुण्ठधामको संकल्प गरिएको छ । नेपालगन्जको मर्निङवाक गर्ने एक समुहले गरेको संकल्पलाई साकार पार्न हालसम्म ३ हजार सदस्सीय मुल समिति सहति बिभिन्न उपसमितिहरु बनेका छन् । धामनिर्माणका सहयोगार्थ बाचनशिरोमणी दीनबन्धु पोखरेलको संयोजनमा कार्तिक २२ देखि ३० गते सम्म धार्मिक महोत्सव हुने भएको छ ।

बैकुण्ठधाम सिधनियाघाट समुहले पितृश्राद्धको तिथिमा पितृको नाममा बैकुण्ठधामको लागि पितृ दक्षिणा संकल्प गर्न सर्वसाधारणमा आह्वान गरेको छ ।