मर्निङवाकमा हिँड्दा हिँड्दै बैकुण्ठधामलाई लाखौं दान

नेपालगन्ज । बाँकेको राप्ती नदीको तटमा संकल्प गरिएको वैकुण्ठधाम सिधनियाघाट निर्माण सहयोगार्थ आर्थिक संकलनले निरन्तरता पाइरहेको छ । मल्मपट्टी ग्रुपका संचालक रहेका डा. बद्री चापागाईले ५ लाख बढी रकम हस्तान्तरण गरेर सुरुभएको आर्थिक संकलन अभियानले निरन्तरता पाइरहेको वैकुण्ठधाम सिधनियाघाट मुल समितिका कोषध्यक्ष कृष्णप्रसाद श्रेष्ठले जनाएका छन् ।

वैकुण्ठधाम सिधनियाघाट निर्माणका लागि मल्हमपट्टी मर्निङवाक ग्रुपका सदस्यहरु संजीव बस्नेत र विमल डाँगीले आज बिहानै मर्निङवाककै क्रममा एक एक लाख हस्तान्तरण गरेका छन् । उनीहरुले आज बिहान कोषाध्यक्ष श्रेष्ठलाई नगद हस्तान्तरण गरेका हुन् ।

कोषाध्यक्ष श्रेष्ठका अनुसार घाट निर्माणका लागि नेपालगञ्ज मेडिकल कलेजका अध्यक्ष खुमा अर्यालले १० लाख ११ हजार १११ दान गर्ने घोषणा गरेका छन् भने सिटी प्यालेस होटलका सञ्चालक लोकेन्द्र अर्यालले ५ लाख ५५ हजार ५५५ दान गर्ने घोषणा गरेका छन् ।

बैकुण्ठधाम निर्माणार्थ यही कार्तिक २२ गतेबाट ३० गते सम्म बाचन शिरोमणी दीनबन्धु पोखरेलको नेतृत्वमा नेपालगन्जमा धार्मिक महोत्सव आयोजना हुने भएको छ । बैकुण्ठधाम जस्ता महान अभियानमा हातेमालो गरेर सहयोग पुर्याउनका कोषाध्यक्ष श्रेष्ठले सम्पूर्ण महानुभावहरुमा आग्रह गरेका छन् ।