सिन्धुपाल्चोक । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले बाढीपहिरोबाट क्षतिग्रस्त सडकको तत्काल मर्मत गरी सहज रूपमा यातायात सञ्चालनको व्यवस्था बनाउन सरकारलाई आग्रह गरेका छन् ।
आज उनले सिन्धुपाल्चोकको सुकुटेमा पार्टीका नेता कार्यकर्ता, जनप्रतिनिधि र सुरक्षा अधिकारीसँग बाढीपहिरो प्रभावित क्षेत्रको पुनर्निर्माणलगायतका विषयमा जानकारी लिएपछि यस्तो आग्रह गरेका हुन् ।
अध्यक्ष प्रचण्डले भौतिक पूर्वाधार तथा यातायात मन्त्रालयका सचिवलाई फोन सम्पर्क गरी यस विषयमा ध्यानाकर्षण गराएको उनको सचिवालयले जनाएको छ । उनले काठमाडौँ–सिन्धुपाल्चोक खण्डमा दुई वटा बेलीबृज बनाउने र पहिरो गएको खण्डमा राम्रोसँग मर्मत गर्ने हो भने आवागमन सहज हुने अवस्था रहेको बताए ।
अध्यक्ष प्रचण्ड भोलि माघ १ गतेदेखि ५ गतेसम्म सञ्चालन हुने आठौँ पुरुष र सातौँ महिला राष्ट्रिय भलिबल प्रतियोगिताको उद्घाटन कार्यक्रमका लागि यहाँस्थित सुकुटे आएका हुन् ।
यसैबीच सिन्धु सुकुटे पर्यटन व्यवसायी सङ्घका अध्यक्ष महेन्द्रसिंह थापाले नेपाल भलिबल सङ्घ, जिल्ला भलिबल सङ्घ सिन्धुपाल्चोक र आफू नेतृत्वको सङ्घले संयुक्त रूपमा प्रतियोगिताको आयोजना गर्न लागेको जानकारी दिएका छन् ।
पहिलोपटक हुन लागेको यस प्रकारको राष्ट्रियस्तरको प्रतियोगिताले सुकुटे क्षेत्रको पर्यटन र खेलकुद क्षेत्रलाई नयाँ उचाइमा पुर्याउने अपेक्षा गरिएको उनले बताए ।
प्रतिक्रिया