काठमाडौं । समाजवादी मोर्चाले चैत २४ गते काठमाडौंमा बृहत जनप्रदर्शन गर्ने भएको छ ।
बुधबार नेकपा (एकीकृत समाजवादी)को केन्द्रीय कार्यालय आलोकनगरमा बसेको मोर्चाको केन्द्रीय संयोजन समितिको दशौं बैठकले चैत २४ गते काठमाडौंमा जनप्रदर्शन गर्ने निर्णय गरेको हो ।
२०४६ साल चैत २४ गते संयुक्त राष्ट्रिय जनआन्दोलन संयोजन समितिको आह्वानमा भएको प्रदर्शनमा पञ्चायती व्यवस्था विरुद्ध काठमाडौंमा लाखौं मानिसहरु सहभागी भएका थिए । मोर्चाले पहिलो जनआन्दोलनको चरमोत्कर्ष पुगेको दिन चैत २४ लाई स्मरण गर्दै प्रदर्शन गर्ने निर्णय गरेको हो । यसअघि चैत पहिलो साता मधेशमा जन प्रदर्शनसहितको कार्यक्रम गर्ने निर्णय भएको छ ।
मोर्चाले फागुन अन्तिमसम्म समाजवादी मोर्चाको बारेमा जानकारी गराउने उद्देश्यले समाजवादी मोर्चा प्रकाशन गर्ने निर्णय गरेको पनि नेकपाका नेता खड्गबहादुर विश्वकर्माले जानकारी दिए । यस्तै देशभर मोर्चा गठन गर्ने निर्णय समेत भएको छ ।
मोर्चामा राष्ट्रिय जनमोर्चा लगायत अन्य राजनीतिक दलहरुलाई भित्र्याउन पनि छलफल अघि बढाउने निर्णय भएको छ । बैठकले वर्तमान सरकार गणतन्त्रविरोधी देखिएको समेत निष्कर्ष निकालेको छ ।
प्रतिक्रिया