काठमाडौं । नेपाली कांग्रेसले गैरसंवैधानिक तरिकाबाट संविधानको घेरा तोड्न खोज्नु अनुचित भएको बताएको छ।
सभापति शेरबहादुर देउवाको निवास बूढानीलकण्ठमा सोमबार बिहान बसेको पदाधिकारी तथा पूर्वपदाधिकारी बैठकपछि पत्रकारहरूसँग कुराकानी गर्दै प्रवक्ता प्रकाशशरण महतले यस्तो बताएका हुन् । उनले सम्बन्धित पक्षले यसलाई गम्भीरताका साथ लिनुपर्ने बताए । बैठकमा राजावादीहरुका पछिल्ला गतिविधिबारे गम्भीर छलफल भएको थियो ।
संविधान संशोधनको विषयलाई सरकारले अघि बढाउने भनिसकेको बताउँदै महतले भने, ‘यो संविधान कसैले दिएको संविधान होइन, नेपाली जनताले आफैले निर्माण गरेको संविधान हो। आफ्ना प्रतिनिधिहरूको माध्यमबाट निर्माण गरेको संविधान भएको हुनाले यो संविधानको रक्षा गर्ने जिम्मेवारी पनि हाम्रो हुन्छ।’ प्रवक्ता महतले अनुभवका आधारमा संविधानमा भएका त्रुटिहरूलाई सुधार गर्नुपर्ने बताए । उनले पार्टी केन्द्रीय कमिटीको बैठक छिटै बस्ने पनि जानकारी दिए ।
प्रतिक्रिया