काठमाडौं । जेनजी आन्दोलनकारीको सांघातिक आक्रमणबाट घाइते भएका नेपाली कांग्रेसका सभापति शेरबहादुर देउवा र उनकी पत्नी आरजु राणा देउवाको स्वास्थ्यमा सुधार भैरहेको पार्टीले जनाएको छ ।
कांग्रेसको केन्द्रीय कार्यसम्पादन समितिको सानेपामा बसेको बैठकपछि प्रचार विभाग प्रमुख मीन विश्वकर्माले पत्रकारहरूसँग कुरा गर्दै सभापति देउवाको स्वास्थ्य सुधारोन्मुख रहेको जानकारी दिएका हुन् । उनका अनुसार आक्रमणमा घाइते देउवा दम्पति दुवैको स्वास्थ्य अवस्थामा सुधार आएको छ।
विश्वकर्माले भने, ‘सभापतिज्यूको टाउकोको पछाडि भागमा गम्भीर चोट छ, जसमा १२ वटा टाँका लगाइएको छ। गर्धनमा पनि चोट छ। दुवै चोट निको हुँदै गएको छ। उहाँ सामान्य बोलचाल र हिँडडुल गर्न सक्नुहुन्छ, तर उठ्दा चक्कर लाग्ने र बोल्दा असजिलो हुने भएकोले केही दिन उपचारमै रहनुहुनेछ।’
बूढानीलकण्ठस्थित निवासमा जेनजी प्रदर्शनका क्रममा भएको आक्रमणकारीले देउवाको टाउकोको पछाडि भाग र गर्धनमा प्रहार गरेका थिए । उनको टाउकोमा १२ वटा टाँका लगाइएको छ। अहिले सभापति देउवा संवाद गर्न सक्ने अवस्थामा रहेको र उनको स्वास्थ्य अवस्था स्थिर रहेको विश्वकर्माले बताए।
नेपाली सेनाले उद्धार गरी देउवा दम्पतीलाई सैनिक अस्पतालमा उपचारका लागि लगेको थियो। हाल उनीहरूको उपचार त्यहीँ भइरहेको छ।
यस्तै, आरजु राणा देउवाको स्वास्थ्यमा पनि सुधार आएको विश्वकर्माले जानकारी दिएका छन्। आक्रमणमा सिसा, रड वा धारिलो हतियार प्रयोग भएको हुन सक्ने अनुमान गरिएको छ।
प्रतिक्रिया