जेनजी पुस्ताको माग प्रधानमन्त्रीको राजीनामा र सरकार परिवर्तन थिएन : अध्यक्ष ओली

काठमाडौँ । नेकपा (एमाले) का अध्यक्ष केपी शर्मा ओलीले जेनजी आन्दोलनले आफ्नो राजिनामा नमागेको र आन्दोलनको उद्देश्य सरकार परिवर्तन पनि नभएको बताएका छन् । आइतबार राजधानीमा केही सञ्चारमाध्यमका सम्पादकहरूसँगको अन्तरक्रियामा ओलीले जेनजीको मागहरु भ्रष्टाचार नियन्त्रण, सुशासन कायम र सामाजिक सञ्जाल खुला राखिनु मात्र रहेको स्पष्ट पारे ।

उनले आफु जेनजी आन्दोलनका ती मागलाई सही र न्यायोचित ठहर गर्दै आफू त्यही उद्देश्यका लागि प्रतिबद्ध रहेको पनि स्पष्ट पारे। ओलीले भने, ‘जेनजीहरूले विरोध प्रदर्शनका लागि तयारी गरेका थिए, तर उनीहरूको खुला तीन वटा माग मात्रै थिए – भ्रष्टाचार नियन्त्रण, सुशासन कायम र सामाजिक सञ्जाल खुला राखिनुपर्छ भन्ने।’

जेनजीका मागहरू राष्ट्रिय हितसँग मेल खाने र सुधारको दिशामा उन्मुख रहेको उनले बताए । ओलीले थपे, ‘उनीहरूले प्रधानमन्त्रीको राजीनामा मागेका थिएनन्। ’

पूर्व प्रधानमन्त्री ओलीले आफू सामाजिक सञ्जाल बन्द गर्ने नभई उत्तरदायी रूपमा सञ्चालन गर्नुपर्ने पक्षमा रहेको पुनः दोहोर्याए।

ओलीले जेनजी आन्दोलन र त्यसपछि भएका मानवीय र भौतिक क्षतिबारे पत्रकारहरुले पनि आत्मआलोचना गर्नु पर्ने बताए ।

एकजना संपादकको यत्रो क्षति हुँदा पनि किन आत्मआलोचित नभएको भन्ने प्रश्नको जवाफमा ओलीले पत्रकारहहरू पनि जेनजी आन्दोलनमा भएको हिंसाको कारक भएको भन्दै आत्मलोचना तपाईंहरुले पनि गर्नुभयो होला भनेर प्रतिप्रश्न गरे।