काठमाडौं । नेपाली कांग्रेस केन्द्रीय कार्यसमितिको बैठक आज पनि बस्दैछ । बैठक बिहान साढे ११ बजे पार्टी केन्द्रीय कार्यालय सानेपामा सुरु हुने भएको हो ।
गत असोज २८ गतेदेखि सुरु भएको उक्त बैठकमा केन्द्रीय सदस्यहरूले आफ्ना धारणा राख्ने क्रम निरन्तर जारी छ । बैठकमा सदस्यहरूले समसामयिक राजनीति, पार्टीको संगठन सुदृढीकरण र आसन्न महाधिवेशनका तयारीबारे सुझाव प्रस्तुत गर्दै आएका छन् ।
बैठकको प्रमुख एजेन्डा भनेकै पार्टीको १५ औँ महाधिवेशनको मिति निर्धारण रहेको छ । प्रतिनिधिसभा निर्वाचन अघि महाधिवेशन गर्ने वा निर्वाचनपछि मात्र गर्ने भन्ने विषयमा पार्टीभित्र मतभेद देखिएको छ ।
महामन्त्रीद्वय गगन थापा र विश्वप्रकाश शर्मा लगायतका नेताहरूले आगामी पुस महिनामै नियमित वा विशेष अधिवेशन गर्नुपर्ने मत व्यक्त गरेका छन् । उनीहरूको तर्क अनुसार, महाधिवेशन समयमै सम्पन्न गर्नु पार्टी सुदृढीकरणका लागि आवश्यक छ । तर, अर्को पक्ष भने आगामी निर्वाचनपछि मात्र महाधिवेशन गर्नुपर्ने पक्षमा रहेको छ ।
मंगलबारको बैठकमा सह-महामन्त्रीद्वय बद्रीप्रसाद पाण्डे र जीवन परियारसहित केन्द्रीय सदस्यहरू ज्ञानेन्द्रबहादुर कार्की, डा. मिनेन्द्र रिजाल, दीपक गिरी, अम्बिका बस्नेत, मीनबहादुर विश्वकर्मा, सीता गुरुङ, रामजनम चौधरी, राजीव विक्रम शाह, प्रकाश रसाइली (स्नेही), भीम पराजुली र गोमाकुमारी भट्टराईले आ-आफ्ना धारणा राखेका थिए ।
बैठकले पार्टीभित्रको आन्तरिक एकता, संगठन विस्तार र आगामी राजनीतिक रणनीतिबारे समेत छलफल जारी राख्ने बताइएको छ ।
प्रतिक्रिया