काठमाडौं । स्वास्थ्य तथा जनसंख्या मन्त्रालय अन्तर्गत संघीय अस्पतालहरूको न्यूनतम सेवा मापदण्ड मूल्यांकनमा चितवनस्थित भरतपुर अस्पताल देशमै पहिलो स्थानमा पर्न सफल भएको छ । अस्पतालहरूको न्यूनतम सेवा मापदण्ड मूल्यांकनमा सबैभन्दा बढी ८८ अंक प्राप्त गर्दै भरतपुर अस्पताल देशकै उत्कृष्ट अस्पताल बनेको हो ।
स्वास्थ्य तथा जनसंख्या मन्त्रालयका नीति, योजना तथा अनुगमन महाशाखा प्रमुख डा। कृष्णप्रसाद पौडेलले भरतपुर अस्पतालले गुणस्तरीय सेवा प्रवाहमा उल्लेखनीय प्रगति गगर्दै सर्वोकृष्ट अंक प्राप्त गरेको जानकारी दिए । आर्थिक वर्ष २०८१/८२ को राष्ट्रिय संयुक्त वार्षिक समीक्षा गोष्ठीमा बोल्दै उनले मापदण्डमा दोस्रो स्थानमा बाँकेको भेरी अस्पताल ८३ अंक प्राप्त गर्दै दोस्रो र पाटन स्वास्थ्य विज्ञान प्रतिष्ठान ७९ अंक पाप्त गर्दै तेस्रो स्थानमा रहेको बताए ।
उनका अनुसार बीपी कोइराला स्वास्थ्य विज्ञान प्रतिष्ठान धरानले ७५, डडेल्धुरा अस्पताल ७३ र राप्ती स्वास्थ्य विज्ञान प्रतिष्ठानले ७१ अंक प्राप्त गरेका छन् ।
यस्तै, राष्ट्रिय स्तरका प्रमुख अस्पतालहरूमा वीर अस्पतालले ६७, परोपकार प्रसूति तथा स्त्रीरोग अस्पतालले ६४, कोशी अस्पतालले ६३, शुक्रराज ट्रपिकल तथा सरुवा रोग अस्पतालले ५९ र नारायणी अस्पतालले ५६ अंक मात्र प्राप्त गरेका छन् ।
मन्त्रालयका अनुसार सप्तरीको गजेन्द्रनारायण सिंह अस्पताल र पाटनको मानसिक अस्पतालको अवस्था भने निकै कमजोर देखिएको छ । गजेन्द्रनारायण सिंहले जम्मा ३६ अंक प्राप्त गरेको छ । त्यसैगरि मानसिक अस्पतालले ३२ अंक ल्याएर सबैभन्दा कमजोर देखिएको महाशाखा प्रमुख पौडेलले बताए । मात्र मापदण्ड पूरा गरेका छन् ।
न्यूनतम सेवा मापदण्डमा क्लिनिकल सेवा, नर्सिङ सेवा, अस्पताल प्रशासन, संक्रमण नियन्त्रण, औषधि व्यवस्थापनलगायत ९० भन्दा बढी सूचकहरू समावेश गरिने मन्त्रालयले जनाएको छ । उनका अनुसार यस वर्षको मूल्यांकनमा १३ वटा संघीय अस्पतालहरूलाई समेटिएको थियो ।
मन्त्रालयले कम अंक ल्याउने अस्पतालहरूलाई तत्काल सुधार योजना पेश गर्न निर्देशन दिए पौडेलले बताए ।
प्रतिक्रिया