काठमाडौं । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाले आगामी प्रतिनिधिसभा निर्वाचन नलड्ने घोषणा गरेपछि उनको परम्परागत निर्वाचन क्षेत्र डडेलधुराबाट कांग्रेसले नयाँ उम्मेदवार अघि सारेको छ । कांग्रेसले डडेलधुरा क्षेत्रको प्रतिनिधिसभा सदस्यका लागि नैनसिंह महरलाई उम्मेदवार बनाउने निर्णय गरेको हो ।
देउवाले फागुन २१ गते हुने प्रतिनिधिसभा निर्वाचनमा उम्मेदवार नबन्ने जानकारी दिएसँगै कांग्रेसले उक्त क्षेत्रमा वैकल्पिक उम्मेदवारको टुंगो लगाएको हो । देउवाको सचिवालयले उम्मेदवारी दर्ता अगावै उनको चुनाव नलड्ने निर्णयबारे औपचारिक जानकारी गराएको थियो ।
२०४८ सालदेखि निरन्तर डडेलधुराबाट चुनाव जित्दै आएका देउवा सो क्षेत्रबाट सात पटक प्रतिनिधिसभा सदस्य निर्वाचित भइसकेका अनुभवी नेता हुन् । लामो समयदेखि पार्टी र सरकारको नेतृत्व गरेका देउवाको निर्वाचनबाट अलग रहने निर्णयलाई कांग्रेसभित्र महत्वपूर्ण राजनीतिक परिवर्तनका रूपमा हेरिएको छ ।
यसैबीच, कांग्रेसको विशेष महाधिवेशनबाट निर्वाचित नयाँ कार्यसमितिले देउवालाई सक्रिय राजनीतिभन्दा बाहिर राख्दै संरक्षक र अभिभावकीय भूमिकामा रहन अनुरोध गर्दै आएको छ । पार्टी नेतृत्वले देउवाको अनुभव र मार्गदर्शनलाई संगठन सुदृढीकरणमा उपयोग गर्ने रणनीति लिएको बताइएको छ ।
डडेलधुराबाट उम्मेदवार बनेका नैनसिंह महरलाई कांग्रेसले नयाँ पुस्ता र स्थानीय नेतृत्वको प्रतिनिधिका रूपमा अघि सारेको छ । देउवाको विरासत बोकेको क्षेत्रमा महरले पार्टीको आधार कायम राख्दै चुनावी प्रतिस्पर्धामा उत्रिने अपेक्षा गरिएको छ ।
प्रतिक्रिया