काठमाडौं । नेपाल कम्युनिष्ट पार्टी (एमाले)का अध्यक्ष केपी शर्मा ओलीले राज्यको अर्बौं रुपैयाँ खर्च भइसकेकाले अब निर्धारित समयमै निर्वाचन सम्पन्न हुनुपर्ने बताएका छन् । उनले निर्वाचन स्थगित गर्ने प्रयास भइरहे पनि एमाले कुनै अलमलमा नपरी चुनाव जित्ने तयारीमा केन्द्रित भइसकेको स्पष्ट पारे ।
अध्यक्ष ओलीले भने, “हामी अब चुनाव होस् भन्ने पक्षमै छौं। चुनाव स्थगित हुन पनि सक्छ, अहिले पनि विभिन्न प्रयास भइरहेका छन् । तर जे भए पनि हामी अलमल नगरी चुनावको तयारीमा लाग्छौं, विजयको तयारीमा लाग्छौं । हामीले जित्नै पर्छ ।”
उनले विगत छ महिनादेखि आफूहरूले विभिन्न तहमा पहल गर्दा कुनै चासो नदेखाइएको तर अन्तिम समयमा आएर निर्वाचन हुँदैन भन्नु गलत भएको टिप्पणी गरे । “छ महिनासम्म हामीले कोशिस गर्यौं, कसैले ध्यान दिएन । अहिले समय नजिकिँदा चुनाव हुँदैन भन्नु उपयुक्त होइन । देशको अर्बौं खर्च भइसकेको छ, उम्मेदवारहरूको खर्च भइसकेको छ,” उनले भने ।
अध्यक्ष ओलीले राष्ट्रिय स्वतन्त्र पार्टीप्रति लक्षित गर्दै आधारहीन र ‘जोडजामवाला’ राजनीति गर्ने दलले अनावश्यक गतिविधि गरिरहेको आरोप लगाए । उनले भने, “सानो भाँडोमा दुध उमालेर तलबाट चर्को आगो बाल्दा जस्तै उम्लिएको एउटा पार्टी छ । जित्दैनौं भन्ने देखिएपछि अर्काका झण्डा जलाउने, निहुँ खोज्ने, वातावरण बिथोल्न खोज्ने, अपमान र बेइज्जत गर्ने काम सुरु गरेको छ ।”
ओलीले निर्वाचनमा पराजयको संकेत पाएपछि केही तत्त्व समाजमा अस्थिरता सिर्जना गर्न सक्रिय भएको दाबी गर्दै पछिल्लो समय रौतहटमा देखिएको घटनाक्रम पनि त्यही प्रवृत्तिको परिणाम भएको टिप्पणी गरे ।
एमाले सधैं जनताको बीचमा रहेर राजनीति गर्दै आएको पार्टी भएकाले जनतामाझ जान कुनै समस्या नभएको उनको भनाइ छ । तर जनताबाट अस्वीकृत हुने देखिएपछि केही समूहले साम्प्रदायिकता फैलाउने, अराजकता निम्त्याउने र निर्वाचनको वातावरण धमिल्याउने प्रयास गरिरहेको उनले आरोप लगाए ।
अध्यक्ष ओलीले शान्तिपूर्ण वातावरणमा निर्धारित समयमै निर्वाचन सम्पन्न गर्न सबै राजनीतिक शक्तिहरू जिम्मेवार बन्नुपर्नेमा जोड दिएका छन् ।
प्रतिक्रिया