तेहरान । इरानले विश्वव्यापी तेल आपूर्तिको प्रमुख समुद्री मार्ग होर्मुज जलडमरूमध्य बन्द गरेको घोषणा गरेको छ । इरानको इस्लामिक रिभोल्युशनरी गार्ड्सले खाडी क्षेत्रमा रहेका जहाजहरूलाई उच्च आवृत्ति (हाई-फ्रिक्वेन्सी) रेडियो सन्देशमार्फत उक्त जलमार्ग प्रयोग नगर्न चेतावनी दिएको अन्तर्राष्ट्रिय सञ्चारमाध्यमहरूले जनाएका छन् ।
होर्मुज जलमार्ग विश्वको तेल र ग्यास आपूर्तिका लागि अत्यन्तै महत्वपूर्ण मार्गका रूपमा चिनिन्छ । यो साँघुरो समुद्री मार्गले फारसको खाडीलाई ओमानको खाडी हुँदै अरब सागरसँग जोड्छ ।
यस जलमार्गको उत्तरतर्फ इरान रहेको छ भने दक्षिणतर्फ ओमान र संयुक्त अरब इमिरेट्स अवस्थित छन् । यस क्षेत्रका अधिकांश देश प्रमुख तेल उत्पादक भएकाले यही मार्गमार्फत विश्वका विभिन्न मुलुकमा तेल निर्यात हुँदै आएको छ ।
करिब १६७ किलोमिटर लामो यो जलमार्गको दुवै प्रवेशद्वार करिब ५० किलोमिटर चौडा छन् भने सबैभन्दा साँघुरो भाग करिब ३३ किलोमिटर मात्र चौडा रहेको छ । समुद्री यातायात व्यवस्थापनका लागि यहाँ करिब तीन किलोमिटर चौडाइको शिपिङ लेन निर्धारण गरिएको छ ।
होर्मुज जलमार्ग बन्द गरिएसँगै विश्व तेल आपूर्ति, अन्तर्राष्ट्रिय व्यापार र ऊर्जा बजारमा प्रभाव पर्ने चिन्ता व्यक्त गरिएको छ ।
प्रतिक्रिया