काठमाडौं । इस्लामिक रिभोलुसनरी गार्ड कोर्प्स (आईआरजीसी) ले अमेरिकी एफ-३५ लडाकु विमानमाथि आक्रमण गरी क्षति पुर्याएको दाबी गरेको छ ।
आईआरजीसीले आक्रमणसँग सम्बन्धित भिडियो सार्वजनिक गरेको जनाएको छ, जसमा जेटलाई लक्षित गरिएको देखिएको उल्लेख गरिएको छ । यद्यपि उक्त भिडियोको स्वतन्त्र रूपमा पुष्टि हुन सकेको छैन ।
यसैबीच, अमेरिकी केन्द्रीय कमान्डले भने इरानमाथि सञ्चालन गरिएको एक अभियानका क्रममा एफ-३५ जेटले आपतकालीन अवतरण गर्नुपरेको स्वीकार गरेको छ । उक्त विमान मध्यपूर्वको एक देशमा सुरक्षित अवतरण गरेको जनाइएको छ ।
सिएनएनका अनुसार कमान्डका प्रवक्ता क्याप्टेन टिम हकिन्सले विमानले आपतकालीन अवतरण गरेको र पाइलट सुरक्षित रहेको जानकारी दिएका छन् । घटनाबारे थप अनुसन्धान भइरहेको छ ।
यद्यपि अमेरिकी पक्षले इरानी आक्रमणकै कारण उक्त अवस्था सिर्जना भएको भन्ने दाबीलाई प्रत्यक्ष रूपमा पुष्टि गरेको छैन ।
रिपोर्टअनुसार, जारी तनावबीच इरानले अमेरिकी सैन्य विमानलाई लक्षित गरेको यो पहिलो घटना हुन सक्ने बताइएको छ । एफ-३५ लाई विश्वकै अत्याधुनिक लडाकु विमानमध्ये एक मानिन्छ, जसको मूल्य १०० मिलियन अमेरिकी डलरभन्दा बढी रहेको छ ।
प्रतिक्रिया