काठमाडौं । अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणमा भएको भनिएको भ्रष्टाचार प्रकरणमा पुनः मुद्दा दायर गरेको छ।
आयोगले पूर्वपर्यटन सचिव केदारबहादुर अधिकारीसहित २१ जनाविरुद्ध विशेष अदालतमा भ्रष्टाचार मुद्दा दर्ता गराएको हो। अख्तियारले नेपाल नागरिक उड्डयन प्राधिकरणका तत्कालीन महानिर्देशक सञ्जीव गौतम, राजन पोख्रेल र प्रदीप अधिकारी लगायतलाई पनि प्रतिवादी बनाएको छ। आयोगले उनीहरूसँग ४६ करोड १५ लाख ८४ हजार ४ सय ३४ रुपैयाँ बिगो दाबी गरेको छ।
यस प्रकरणमा दुई कम्पनीलाई समेत प्रतिवादी बनाउँदै मुद्दा दायर गरिएको अख्तियारले जनाएको छ।
आयोगका अनुसार पोखरा क्षेत्रीय अन्तर्राष्ट्रिय विमानस्थल निर्माणका क्रममा परामर्श सेवा खरिद प्रक्रियामा अनियमितता र भ्रष्टाचार भएको आशंकामा अनुसन्धानपछि मुद्दा दायर गरेको हो ।
प्रतिक्रिया