काठमाडौं । नेपाल चिकित्सक संघले वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको आक्रमण र अस्पतालमा भएको तोडफोडका दोषीलाई कारबाही गर्न सरकार गम्भीर नदेखिएको भन्दै आज पनि देशभर आकस्मिक सेवाबाहेकका सबै स्वास्थ्य सेवा बन्द गरेको छ ।
संघले मंगलबारदेखि आन्दोलन सुरु गर्दै आकस्मिकबाहेकका सम्पूर्ण स्वास्थ्य सेवा स्थगित गरेको थियो। आन्दोलन आज दोस्रो दिन पनि निरन्तर रहने जनाएको छ ।
संघका अनुसार घटना भएको चार दिन बितिसक्दा पनि दोषीविरुद्ध कानुनबमोजिम मुद्दा दर्ता गरी कारबाही गरिएको छैन । पीडित चिकित्सक तथा स्वास्थ्यकर्मीमाथि नै अन्याय भएको तथा वार्ताका लागि गएका चिकित्सकमाथि पर्साका प्रमुख जिल्ला अधिकारी र प्रहरी प्रमुखले दुर्व्यवहार गरेको आरोप संघले लगाएको छ । यस्तो व्यवहारलाई संघले निन्दनीय र दुःखद भनेको छ ।
घोषित कार्यक्रमअनुसार आज देशभरका अस्पतालमा आकस्मिक सेवाबाहेकका सबै स्वास्थ्य सेवा बन्द रहनेछन् । काठमाडौं उपत्यकाका चिकित्सक तथा स्वास्थ्यकर्मी बिहान १० बजे माइतीघर मण्डलामा भेला भई विरोध प्रदर्शन गर्नेछन् ।
त्यसैगरी, काठमाडौं उपत्यकाबाहिरका चिकित्सक तथा स्वास्थ्यकर्मीले सम्बन्धित जिल्ला प्रशासन कार्यालयमा ज्ञापनपत्र बुझाउने, साथै आफू कार्यरत स्वास्थ्य संस्थामा धर्ना दिएर विरोध जनाउने कार्यक्रम तय गरिएको छ ।
नेपाल चिकित्सक संघले विशेषज्ञ चिकित्सकका संस्था, निजी स्वास्थ्य संस्थाका संगठन, स्वास्थ्य क्षेत्रमा क्रियाशील विभिन्न संघ-संस्था तथा सम्पूर्ण चिकित्सक र स्वास्थ्यकर्मीलाई आन्दोलनमा ऐक्यबद्धता जनाउन आग्रह गरेको छ ।
संघले आन्दोलनका कारण सर्वसाधारणमा पर्न गएको असुविधाप्रति क्षमायाचना गर्दै त्यसको जिम्मेवारी नेपाल सरकारको हुने स्पष्ट पारेको छ ।
यसैबीच, नारायणी अस्पतालमा कार्यरत ८० चिकित्सकमध्ये ७१ जनाले मंगलबार सामूहिक राजीनामा दिएका छन् ।
प्रतिक्रिया