काठमाडौं । नेकपा एमाले अध्यक्ष केपी शर्मा ओलीले नेता घनश्याम भुसालको टिकट पनि खोसेका छन् ।
एमालेमा १० बुँदेको पक्षधर भुसालको ठाउँमा ओलीले तालमेलको नाममा रुपन्देही क्षेत्र नं. ३ राप्रपालाई दिएपछि भुसाल टिकट पाउनबाट बञ्चित भएका छन् ।
ओलीले १० बुँदेका नेता भीम रावलको टिकट खोसिसकेका छन् । भुसाल र रावल ओलीको निर्देशन विपरित गत महाधिवेशनमा उम्मेदवारी दिएका थिए ।
ओलीले रुपन्देहीसहित लुम्बिनी प्रदेशका सबै उम्मेदवारको सूची प्रदेश इन्चार्ज छविलाल विकलाई बुझाइसकेका छन् ।
रुपन्देही १ मा छविला विश्वकर्माले नै टिकट पाएका छन् । यस प्रदेशको प्रदेशसभा क मा तालमेलका उम्मेदवारले पाउनेछन् भने ख मा माओवादी छोडेर एमाले बनेका दधिराम न्यौपानेले पाएका छन् ।
क्षेत्र नं. २ मा साविककै विष्णु पौडेलले टिकट पाएका छन् । २ को क मा लिला गिरी र ख मा भोजप्रसाद श्रेष्ठले पाएका छन् । घनश्याम भुसालले यसअघि चुनाव जितेको ३ मा राप्रपाका उम्मेदवारलाई एमालेले सघाउने छ । यस क्षेत्रको क मा तालमेलका उम्मेदवारलाई सघाउने छ भने ख मा तुलसीप्रसादलाई टिकट दिएको छ ।
क्षेत्र नं. ४ मा तालमेलका उम्मेदवारलाई सघाउने छ । जनता समाजवादी पार्टी जसपा एमालेसँग मिसिएपछि सोही पार्टीका उम्मेदवारलाई एमालेले सघाउने भएको हो । प्रदेशसभा तर्फ क मा हजरत अलिले टिकट पाएका छन् भन् ख तालमेलका लागि छुट्याइएको छ ।
क्षेत्र नं. ५ पनि तालमेलका लागि छुट्याइएको छ । यस क्षेत्रको प्रदेशसभा कमा भुमेश्वर ढकाललाई टिकट दिइएको छ भने ख मा तालमेलका लागि छुट्याइएको छ ।
प्रतिक्रिया