काठमाडौं । प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले समाजवादी मोर्चाको घोषणा परिवर्तनहरु उल्ट्याउने र मुलुकलाई फेरि प्रतिगमनतिर फर्काउन खोज्नेहरुविरुद्ध युद्धको घोषणा भएको बताएका छन् । माओवादी केन्द्रसहित चार दलको समाजवादी मोर्चा घोषणा कार्यक्रमलाई सम्बोधन गर्दै अध्यक्ष प्रचण्डले मोर्चाले सदन र सडक दुबै स्थानबाट समाजवाद स्थापनाको अग्रगमनको पक्षमा अभियान चलाउने बताए ।
उनले अग्रगमन पक्षधर, प्रगतिशील, वामपन्थी शक्तिहरुलाई मोर्चामा सामेल भएर हातेमालो गर्न आह्वान गरे ।
प्रचण्डले अहिले परिर्वतनलाई होच्याउने, अपमानित गर्न खोज्ने अराजक र प्रतिगामी प्रवृत्तिले केही मान्छेहरुले टाउको उठाउन खोजेको उल्लेख गरे । उनले भने, ‘७० वर्ष संघर्ष गरेर स्थापित भएको जनताको अधिकार खोसेर देशलाई प्रतिगमनतिर फर्काउन चाहनेहरुका लागि मोर्चा गठन आर्फमा चुनौती हो । यो मोर्चा तिनका विरुद्ध युद्धको घोषणा हो ।’
प्रचण्डले विगतमा हतारमा पार्टी एकता गरेर नेकपा बनाएकाले असफल बनेको बताउँदै नेकपा टिक्न नसक्नुमा सबै समीक्षा गर्नुपर्ने पनि बताए । उनले मोर्चा कसैको विपक्षमा नरहेको दाबी गरे । ‘यो मोर्चा कुनै परिवर्तनका पक्षधर, गणतन्त्रका पक्षधर, उत्पीडित जाति समुदायका विरुद्ध परिलक्षित छैन’, प्रचण्डले क्षणिक र आवेगमा मोर्चा गठन नगरिएको पनि बताए ।
मोर्चा आवद्ध रहेको पार्टी भि अझै केही फोहर रहेको चर्चा गर्दै उनले विप्लवको उपस्थितीले ती फोहोर सफा गर्न सहज हुने दाबी गरे । ‘हामीले एकता र स्वतन्त्रताको द्वन्द्ववादलाई प्रयोग गर्ने कोसिस गर्ने प्रयास गरेका छौ । हरेक पार्टीको स्वतन्त्रतालाई पनि सिद्ध्याउने काम गरेका छैनौ’, प्रचण्डले भने ।
प्रतिक्रिया