काठमाडौं । राष्ट्रियसभाका विषयगत समितिमा सभापति निर्वाचनको लागि उम्मेदवारी दर्ता भएको छ ।
राष्ट्रियसभा नियमावली २०७५ को नियम १५० को उपनियम (२) बमोजिम सभापतिका लागि आज चार जनाले उम्मेदवारी दर्ता गराएका छन् । उम्मेदवारी दर्ताको समय विहान ११ बजेबाट ४ बजेसम्म तोकिएको छ ।
विषयगत समिति अन्तर्गत विधायन व्यवस्थापन समितिमा परशुराम मेघी गुरुङ, दिगो विकास तथा सुशासन समितिमा तारादेवी भट्ट,प्रत्यायोजित व्यवस्थापन तथा सरकारी आश्वासन समितिमा रामनारायण विडारी र राष्ट्रिय सरोकार तथा समन्वय समितिमा दिलकुमारी रावल थापाको उम्मेदवारी दर्ता भएको संसद सचिवालयले जनाएको छ ।
सभापतिको निर्वाचन साउन २३ गते दिउँसो १ बजे निर्वाचन हुने भएको छ । सभापतिको निर्वाचनका लागि एकजना मात्रै उम्मेवारी परेमा सम्बन्धित समितिको बैठकमा निर्विरोध निर्वाचित भएको घोषणा हुने छ ।
प्रतिक्रिया