भैरहवा । भैरहवास्थित गौतमबुद्ध अन्तर्राष्ट्रिय विमानस्थलको धावनमार्गमा फसेको बुद्ध एयरको जहाज फसेको २० घण्टापछि धावनमार्गबाट निकालिएको छ ।
बिहिबार राती ९ बजेबाट धावनमार्गबाट चिप्लिएर घांसे मैदानमा पुगेको जहाजलाई आज प्राविधिक टोलीले निकाल्न सफल भएको विमानस्थलका महाप्रवन्धक प्रतापबाबु तिवारीले बताए । बुद्धको उडान नम्बर ८०५ जहाज नाइनएन–एओसी काठमाडौंबाट उडान भरेर भैरहवा अवतरण गर्ने क्रममा चिप्लिएर घांसे मैदानमा पुगेको थियो ।
९ बजेर ३ मिनेट जाँदा भैरहवा विमानस्थलमा अवतरण गरेको सो जहाज धावनमार्गको आधा पुग्दा चिप्लिन पुगेको बुद्ध एयरले जनाएको छ ।
जहाज धावनमार्गमा चिप्लिएपछि पाइलटले एटीसीलाई जानकारी गराएसँगै यात्रुलाई सुरक्षित रूपमा झारिएको थियो ।
जहाजलाई प्राविधिकले आज साँझ ६ बजे धावनमार्गबाट निकालेको छ । जहाजको अवस्थाबारे अध्ययन भइरहेको कम्पनीले जनाएको छ ।
प्रतिक्रिया