काठमाडौं । नेकपा (एमाले) ले ११ औँ महाधिवेशनपछि पहिलोपटक पार्टीको सचिवालय बैठक बोलाएको छ । पार्टी केन्द्रीय कार्यालय च्यासलमा आइतबार बिहान ११ बजे बस्ने बैठकमा मुख्यत: समानुपातिक तर्फका उम्मेदवारको अन्तिम नामावली टुंग्याउने एजेन्डा रहेको छ ।
पार्टी केन्द्रीय कार्यालयका सचिव डा. भीष्म अधिकारीका अनुसार निर्वाचन आयोगले तोकेको समयसीमाअनुसार समानुपातिक उम्मेदवारको बन्दसूची बुझाउनुपर्ने भएकाले बैठक अत्यन्तै महत्वपूर्ण मानिएको छ । आयोगले आगामी फागुन २१ गते हुने प्रतिनिधिसभा निर्वाचनका लागि पुस १३ गतेसम्म समानुपातिक उम्मेदवारको सूची बुझाउन दलहरूलाई समय दिएको छ ।
एमाले स्रोतका अनुसार जिल्ला र प्रदेश कमिटीबाट आएका आकांक्षीहरूको नाम संकलन गरी पार्टी अध्यक्ष केपी शर्मा ओली, महासचिव शंकर पोखरेलसहितका शीर्ष नेताहरूले छोटो सूची तयार गरिसकेका छन् । सोही सूचीमाथि छलफल गर्दै आजको बैठकले अन्तिम निर्णय गर्ने तयारी गरिएको छ ।
बैठकमा समानुपातिक उम्मेदवार छनोटसँगै पार्टी कार्यालय व्यवस्थापन, पछिल्लो राजनीतिक परिस्थिति तथा समसामयिक विषयमा पनि छलफल हुने बताइएको छ । साथै प्रधानमन्त्रीले आजै प्रमुख तीन दलका शीर्ष नेतासँग गरेको छलफलका विषयमा पनि अध्यक्ष ओलीले सचिवालय बैठकमा जानकारी गराउने कार्यसूची रहेको एक पदाधिकारीले बताए ।
एमालेले समानुपातिक सूची समावेशी सिद्धान्तअनुसार तयार गर्ने बताउँदै आएको छ । दलभित्र महिला, आदिवासी जनजाति, दलित, मधेसी, थारु तथा अल्पसंख्यक समुदायको प्रतिनिधित्व सुनिश्चित गर्नुपर्ने दबाबसमेत रहेको छ । आजको बैठकबाट नाम टुंगिएसँगै भोलि नै निर्वाचन आयोगमा सूची बुझाइने तयारी गरिएको छ ।
प्रतिक्रिया