काठमाडौं । सर्वोच्च अदालतले दुर्गा प्रसाईंलाई थुनामुक्त गर्न आदेश दिएको छ ।
बन्दी प्रत्यक्षीकरण रिटमा आदेश जारी गर्दै उनलाई गैरकानुनी थुनाबाट मुक्त गर्न निर्देशन दिएको हो ।
मंगलबार न्यायाधीश मनोजकुमार शर्मा र मेघराज पोखरेलको संयुक्त इजलासले प्रसाईंलाई थुनामा राख्ने आधार पर्याप्त नभएको ठहर गर्दै रिहा गर्न आदेश दिए ।
यसअघि सोमबार न्यायाधीश नहकुल सुवेदी र मेघराज पोखरेलको इजलासले निर्वाचन आयोगले कारबाहीका लागि प्रहरीलाई पठाएको निर्णयसम्बन्धी सक्कल फाइल झिकाउन आदेश दिएको थियो।
राष्ट्र, राष्ट्रियता, धर्म, संस्कृति नागरिक बचाउ महाअभियानका संयोजक प्रसाईंले जिल्ला प्रहरी परिसर काठमाडौंलाई विपक्षी बनाई रिट दायर गरेका थिए।
जिल्ला प्रहरी परिसर काठमाडौंले सर्वोच्चमा पेश गरेको लिखित जवाफमा निर्वाचन आयोगले फागुन ३ गते पठाएको पत्रका आधारमा फागुन ४ गते प्रसाईंलाई पक्राउ गरिएको उल्लेख गरेको थियो।
सर्वोच्चले आफ्नो आदेशमा निर्वाचन आयोगले प्रसाईंमाथि अनुसन्धान र कारबाही गर्न लेखी पठाउने निर्णयसहितको सक्कल फाइल महान्यायाधिवक्ताको कार्यालयमार्फत झिकाउन निर्देशन दिएको थियो।
निर्वाचन आयोगको पत्रपछि प्रहरीले प्रसाईंलाई पक्राउ गरेको थियो भने अब सर्वोच्चको आदेशसँगै उनको रिहाइको प्रक्रिया अघि बढ्ने भएको छ।
प्रतिक्रिया