काठमाडौं । मेडिकल व्यवसायी दुर्गा प्रसाईंलाई प्रहरीले पक्राउ गरी अनुसन्धानका लागि तीन दिनको म्याद लिएको छ । सोमबार राति पर्साको वीरगञ्जस्थित होटल सिद्धार्थ दियालोबाट पक्राउ परेका प्रसाईंलाई जिल्ला प्रहरी कार्यालय पर्साको हिरासतमा राखिएको थियो ।
मंगलबार जिल्ला अदालत पर्सामा उपस्थित गराइएका प्रसाईंविरुद्ध अदालतले अनुसन्धानका लागि तीन दिनको म्याद दिएको हो ।
प्रहरीका अनुसार सामाजिक सञ्जालमार्फत उत्तेजक अभिव्यक्ति दिने, सामाजिक सद्भाव खलबल्याउने तथा राज्यविरुद्ध उक्साउने गतिविधिमा संलग्न रहेको उजुरीका आधारमा उनलाई पक्राउ गरिएको हो । प्रहरीले ‘माथिको आदेश’ अनुसार उनलाई नियन्त्रणमा लिइएको जनाएको छ ।
‘राष्ट्र, राष्ट्रियता, धर्म, संस्कृति र नागरिक बचाऔँ महाअभियान नेपाल’का संयोजक प्रसाईं एक कार्यक्रममा सहभागी हुन वीरगञ्ज पुगेका थिए । उक्त कार्यक्रम बुधबारका लागि तय गरिएको थियो ।
प्रसाईं यसअघि पनि विभिन्न राजनीतिक विवाद र अभिव्यक्तिका कारण चर्चामा रहँदै आएका छन् । प्रहरीले घटनाबारे थप अनुसन्धान भइरहेको जनाएको छ ।
प्रतिक्रिया