काठमाडौं । नेकपा एमालेको सचिवालय बैठक आज पनि बस्ने भएको छ । बैठक बिहान ११ः३० बजे अध्यक्ष केपी शर्मा ओलीको निवास गुण्डुमा बस्ने तय भएको छ ।
शुक्रबार बसेको बैठकमा पार्टीका पाँच उपाध्यक्षले समीक्षात्मक धारणा राखेपछि बैठक निष्कर्षमा नपुग्दै स्थगित गरिएको थियो । आजको बैठकमा उनीहरूले दिएको सुझावका आधारमा नेताहरूको कार्यविभाजनका लागि प्रस्तावित नाममा संशोधन हुनसक्ने बताइएको छ ।
बैठकमा १२ जना पदाधिकारीले धारणा राख्ने कार्यसूची रहेको जनाइएको छ । त्यसपछि पार्टी नेताहरूको कार्यविभाजनबारे विस्तृत छलफल हुने एमाले स्रोतले जनाएको छ ।
यसअघि अध्यक्ष केपी शर्मा ओलीले विभिन्न विभाग तथा जिम्मेवारीका लागि नेताहरूको नाम प्रस्ताव गरेका थिए । सचिवालय बैठकमार्फत त्यसलाई अन्तिम रूप दिने तयारी गरिएको छ ।
एमालेले आगामी स्थानीय तह निर्वाचनलाई लक्षित गर्दै संगठन सुदृढीकरण र जिम्मेवारी बाँडफाँटलाई प्राथमिकतामा राखेको छ । पार्टीभित्र विभागीय कामलाई प्रभावकारी बनाउने उद्देश्यले कार्यविभाजनलाई व्यवस्थित गर्न लागिएको बताइएको छ ।
प्रतिक्रिया