काठमाडौं । प्रतिनिधिसभा पुनर्स्थापना भएपछि प्रचण्ड नेपाल नेकपाको संसदीय दलको अनौपचारिक बैठक बसेको छ ।
सिंहदरबारस्थित नेकपा संसदीय दलको कार्यालयमा बसेको अनौपचारिक बैठकमा अध्यक्षद्वय पुष्पकमल दाहाल प्रचण्ड र माधवकुमार नेपालले विकसित नयाँ राजनीतिक परिस्थितिमा कसरी अगाडि बढ्ने भन्ने विषयमा सांसदहरुलाई जानकारी गराएका छन् ।
बैठकमा सुरुमा कुरा राख्दै अध्यक्ष माधवकुमार नेपालले ओली तर्फ गएका सांसदहरु फर्किन चाहेको बताएका थिए । अध्यक्ष नेपालले ओली पक्षमा भएका सांसदहरुलाई ल्याउनका लागि थप पहल गर्न समेत आग्रह गरेका छन् ।
सर्वोच्च अदालतले १३ दिनभित्र संसद बैठक बोलाउन आदेश जारी गरेसँगै प्रचण्ड नेपाल नेकपा उत्साहित भएको छ । नेकपाले प्रधानमन्त्री केपी शर्मा ओलीले तत्काल पदबाट राजीनामा दिनुपर्ने बताएको छ । बैठक अहिले पनि जारी छ । धेरै सांसदहरु काठमाडौं बाहिर भएका कारण सबैको उपस्थिति हुन नसकेको नेकपाले जनाएको छ ।
सबै सांसदहरुको उपस्थिति भएपछि संसदीय दलको औपचारिक बैठक बस्ने बताइएको छ । सरकारले प्रतिनिधि सभा विघटन गरेकै दिन प्रचण्ड–नेपाल पक्षका ९० जना सांसदको हस्ताक्षरसहित प्रधानमन्त्री ओली विरुद्ध संघीय संसद सचिवालयमा अविश्वासको प्रस्ताव दर्ता गराएका थिए । ती मध्ये केही सांसदहरु ओली पक्षमा लागेका छन् । तर, प्रतिनिधिसभा पुनर्स्थापित भैसकेका कारण ओली समुहमा रहेका केही सांसद आफ्नो समुहमा आउने प्रचण्ड नेपाल नेकपाले दाबी गरेको छ ।
प्रतिक्रिया