काठमाडौं । प्रचण्ड नेपाल पक्षको नेपाल कम्युनिष्ट पार्टी नेकपाले संसद सचिवालयलाई दलको नेता परिवर्तन गरेको पुनः जानकारी गराएको छ ।
संसदीय दलका नेता पुष्पकमल दाहाल प्रचण्ड, अध्यक्ष माधवकुमार नेपालसहितका नेताहरुले संसद सचिवालयका महासचिव भरतराज गौतमलाई भेट गरेर दलको नेता परिवर्तन गराएको जानकारी गराएका हुन् । उनीहरुले संसद सचिलालयले दल नेता परिवर्तनबारेको सूचना दर्ता नगरेको विषयमा जानकारी समेत लिएका छन् ।
महासचिव गौतमले भने परामर्श गरेर अगाडि बढ्ने बताएका छन् ।
शुक्रबार बसेको नेकपा संसदीय दलको बैठकले बहुमत सांसदको उपस्थितिमा दलको नेताबाट प्रधानमन्त्री केपी शर्मा ओलीलाई हटाएर प्रचण्डलाई चयन गरेको थियो । सोही जानकारी गराउन प्रचण्ड नेपाल पक्षका नेताहरु संसद सचिवालय पुगेका हुन् ।
त्यसक्रममा वरिष्ठ नेता झलनाथ खनाल, मुख्य सचेतक देव गुरुङ लगायतका नेताहरु सहभागि भएका थिए ।
ओली पक्षले भने प्रचण्ड नेपाल पक्षलाई अलग्लै मान्यता नदिन संसद सचिवालयलाई चेतावनी दिएको छ । प्रचण्ड नेपाल पक्षले अलग्गै मान्यता पाए संसदमा मुठभेडको अवस्था आउने ओली पक्षको भनाइ छ ।
प्रतिक्रिया