नेपालगन्ज । कोरोना भाइरसको संक्रमणको दोस्रो लहर देशका विभिन्न जिल्लामा बढ्दै जाँदा बाँके जिल्लामा पनि निरन्तर बढ्दै गएको छ ।
कोरोना संक्रमणकै कारण भेरी अस्पतालमा उपचाररत एक वृद्धा महिलाको मृत्यु भएको छ ।
अस्पतालको कोभिड वार्डको भेन्टिलेटरमा उपचाररत बर्दियाको गेरुवा ३ की ७५ वर्षीया वृद्धाको सोमबार दिउसो १ बजेर ४० मिनेटमा मृत्यु भएको जिल्ला कोभिड १९ सङ्कट व्यवस्थापन केन्द्र बाँकेले जनाएको छ । मृतक महिला यही चैत २३ गते अस्पताल भर्ना भएकी थिइन ।
योसँगै बाँकेमा बाहिरी जिल्लाबाट उपचार गर्न आएर मृत्यु हुनेको संख्या ९१ पुगेको छ । केही दिनअघिसम्म बाँकेमा कोरोना संक्रमण दर शुन्यमा झरेको थियो ।
जनस्वास्थ्य मापदण्ड पालनामा हेलचक्र्याईं गरिँदा र भारतीय सीमा क्षेत्रबाट नेपाल प्रवेश गर्नेहरुलाई चेकजाँचको उचित व्यवस्था नहुँदा बाँके पुनः कोरोना हटस्पट बन्ने हो कि भन्ने चिन्ता थपिँदै गएको छ ।
सोमबार मात्रै नेपाल भारत सीमानाका जमुनाहमा तीन जनामा कोरोना देखिएको जिल्ला कोभिड १९ सङ्कट व्यवस्थापन केन्द्र बाँकेले जनाएको छ । पछिल्लो २४ घण्टामा मात्रै ४१ जनामा संक्रमण पुष्टि भएको छ ।
प्रतिक्रिया