‘लकडाउन’मा गुनासो सुन्न सीसीएमसीको ‘टोल फ्री’ संयन्त्र

काठमाडौं । राज्यका तल्ला निकयले ‘लकडाउन’का बेला दुःखमा परेका सर्वसाधारणको समस्यामा बेवास्ता गरेको जनगुनासो बढेपछि कोरोना संक्रमण रोकथाम तथा नियन्त्रणका लागि केन्द्रस्तरमा गठन भएको कोभिड–१९ सङ्कट व्यवस्थापन केन्द्र (सीसीएमसी)ले सिधै जनताको गुनासो सुन्ने र सम्बोधन गर्ने संयन्त्र तयार गरेको छ । कोरोना सङ्क्रमण र ‘लकडाउन’मा जनताका गुनासा सम्बोधन गर्नका लागि सीसीएमसीले संयन्त्र गठन गरेको हो । सिसिएमसीका निर्देशक उपप्रधानमन्त्री ईश्वर पोखरेलको निर्देशनमा जनताका गुनासा, उजुरी तथा सुझावको तत्काल कार्यान्वयन गर्नका लागि संयन्त्र गठन गरिएको उपप्रधानमन्त्री पोखरेलका प्रेस सल्लाहकार गणेश पाण्डेले जानकारी दिए ।

प्रेस सल्लाहकार पाण्डेका अनुसार जनताका गुनासा टोल फ्री नं ११४० मा फोन गरे २४ घण्टाभित्र समस्याको समाधान हुने छ भने सर्वसाधारणले शव व्यवस्थापनका लागि १०५ र एम्बुलेन्सका लागि १०२ मा सम्पर्क राख्न सक्ने छन् ।

यसैगरी विदेश जाने र विदेशबाट आउनेले सीसीएमसीको वेबसाइट ccmc.gov.np रहेको फारम भर्न सीसीएमसीले आग्रह गरेको छ । कोरोना भाइरस सङ्क्रमणको दर उच्च भएपछि सरकारले आजदेखि उपत्यका लगायत मुलुकको धेरै स्थानहरुमा वैशाख मसान्तसम्म लकडाउनको घोषणा गरेको छ ।