एजेन्सी । प्रधानमन्त्री केपी शर्मा ओलीले अयोध्याका विषयमा दिएको अभिव्यक्तिको भारतका विभिन्न ठाउँमा विरोध भएको छ । दुई दिनअघि भारतको बनारसमा एक नेपाली युवकले प्रधानमन्त्री ओलीविरुद्धको प्रदर्शनमा साथ दिन मुण्डन गरेको समाचार सार्वजनिक भएको थियो । तर, अनुसन्धानका क्रममा ती युवक नक्कली नेपाली बनेको खुलासा भएको छ ।
प्रधानमन्त्री ओलीविरुद्ध मुण्डन गरेर प्रदर्शन गर्ने व्यक्ति प्रायोजितरुपमा नेपाली बनाइएको रहस्य खुलेको छ । ती व्यक्ति बनारसकै बासिन्दा हुन् । पुलिसले ती युवकको आधार कार्ड र मतदाता नामावलीसमेत सार्वजनिक गरेको छ । युवकले मुण्डनका लागि एक हजार भारतीय रुपैयाँ लिएको बताएका छन् । पुलिसले यो प्रकरणमा संलग्न ६ जनालाई गिरफ्तार गरेको छ ।
बनारसका एसएसपी अमित पाठकले मुण्डन गर्ने व्यक्ति सरकारी निवासमा बसोबास गर्ने र बाबुआमा सरकारी सेवामा रहेको बताए । १६ जुलाइमा अरुण पाठक भन्ने व्यक्तिले आफ्नो फेसबुकमा यो भिडियो सार्वजनिक गरेका थिए । भिडियोमा नेपालका प्रधानमन्त्री र देशलाई नै आपत्तिजनक टिप्पणी गरिएको थियो ।
एसएसपी अमित पाठकले अहिलेसम्म ६ जनालाई गिरफ्तार गरिएको जानकारी दिए । सन्तोष पाण्डे, आशिष मिश्रा, राजु यादव, अमित दुवे, राजेश राजभर र जयगणेश शर्मालाई प्रहरीले पक्रेको छ । विश्व हिन्दु सेनाका अध्यक्ष एवं यो मुण्डन काण्डका मुख्य अभियुक्त अरुण पाठक भने फरार रहेको प्रहरीले जनाएको छ ।
प्रतिक्रिया