बाँकेमा एकै दिन २ जना कोरोना संक्रमितको मृत्यु, ८० वर्षीया मृतकको मृत्युपछि संक्रमण पुष्टि

नेपालगन्ज । बाँकेमा थप १ जना कोरोना संक्रमितको मृत्यु भएको छ । नेपालगन्ज मेडिकल कलेजमा उपचाररत नेपालगन्ज १६ की ८० वर्षीया महिलाको मृत्यु भएको स्वास्थ्य कार्यालय बाँकेले जनाएको छ ।

आज बिहान ७ बजे मृत्यु भएकी महिलाको मध्यान्ह ३ः३० बजे मात्र कोरोना संक्रमण भएको पुष्टि भएको थियो ।

गत भाद्र २१ गते स्वास्थ्यमा समस्या आएपछि नेपालगन्ज मेडिकल कलेजमा भर्ना भएकी महिलाको २२ गते स्वाव संकलन गरि पीसीआर परीक्षणमा पठाईएकोमा आज बिहान उनको मृत्यु भएको थियो भने पीसीआरको रिपोर्ट मध्यान्ह पछि आएको थियो ।

मृतक महिलामा पहिलेदेखि नै उच्च रक्तचाप र मधुमेहको समस्या रहेको स्वास्थ्य कार्यालय बाँकेका अधिकृत नरेश श्रेष्ठले बताए ।

आजै मात्र मेडिकल कलेजमा अर्घाखाँचीको संक्रमित टिप्पर चालकको पनि मृत्यु भएको थियो । यो संगै बाँकेमा मृत्यु हुने संक्रमितको संख्या ८ पुगेको छ ।