बर्दियाका थप एक संक्रमितको भेरी अस्पतालमा मृत्यु

नेपालगन्ज । बाँकेमा कोरोना संक्रमणका कारण सोमबार थप एक जना संक्रमितको मृत्यु भएको छ ।

संक्रमणबाट बर्दियाका ७२ वर्षीय वृद्धको मृत्यु भएको हो । यो सँगै बर्दिया कोरोना संक्रमितबाट मृत्यु हुने संख्या १५ पुगेको छ ।

जिल्ला कोभिड-१९ संकट व्यावस्थापन केन्द्र डीसीसीएमसी बाँकेले जारी गरेको प्रेस विज्ञप्ति अनुसार गेरुवा गाउँपालिका वडा नं.५ बर्दियाका ७२ वर्षीय पुरुषको उपचारको क्रममा सोमबार बिहान १:११ बजे भेरी अस्पताल नेपालगन्जमा मृत्यु भएको हो ।

उनमा कोभिड-१९ को लक्षणका कारण मंसिर १३ गते भेरी अस्पतालमा नमूना संकलन गरिएको र मंसिर १४ गते नमूनाको परिक्षण गर्दा कोभिड-१९ पोजेटिभ देखिएपछि १५ गते अस्पतालमा भर्ना गरीएको थियो ।

श्वास प्रश्वासमा समस्या भएका ति वृद्धलाइ कोभिड-१९ आइसोलेसन युनिटमा राखि उपचार गरीएको उनको आज बिहान १:११ बजे मृत्यु भएको अस्पताल स्रोतले पुष्टी गरेको छ ।

योसँगै बाँकेमा अन्य जिल्लाबाट उपचारका लागि पुगेर मृत्यु हुनेको संख्या ६४ पुगेको छ ।