बुटवल । नेत्र विक्रम चन्द विप्लव नेतृत्वको प्रतिबन्धित नेकपाका दुई नेता बुटवलबाट पक्राउ परेका छन् ।
बुटवलको ट्राफिक चोकमा बिहीबार भएको रणनीतिक संयुक्त मोर्चाको सभामा सहभागी भएका विप्लवका नेता भेषराज भुषाल र देवबहादुर केसी पक्राउ परेका हुन् । मोर्चाले बुटवलमा आज पत्रकार सम्मेलन गरी प्रहरीले भुषाललाई सभामा सम्बोधन गरे लगत्तै पक्राउ गरेको जनाएको छ ।
मोर्चामा विप्लव नेकपासहित वैद्य नेतृत्वको नेकपा-क्रान्तिकारी (माओवादी), वैज्ञानिक समाजवादी कम्युनिस्ट पार्टी लगायतका साना वामपन्थी पार्टी र समुहहरु रहेका छन् । केही दिन पहिला गठन भएको मोर्चाले बुटवलमा पहिलो सभा गरेको हो ।
मोर्चाले गिरफ्तार भुषाल र केसीको रिहाईको माग गरेको छ । मोर्चाले सरकारले फासीवादी दमन गरेको आरोप लगाएको छ ।
शान्तिपूर्ण कार्यक्रममा सहभागी भएर आफ्नो विचार राखेकै आधारमा पक्राउ गर्नुले सरकार अभिव्यक्ति स्वतन्त्रताको संविधानप्रदत्त न्यूनतम अधिकार समेत हनन गर्न चाहन्छ भन्ने प्रष्ट भएको जनाएको छ । पत्रकार सम्मेलनमा मोर्चाका नेताहरु रामसिंह श्रीस र ऋषि कट्टेलले सरकारी दमनलाई परास्त गर्ने प्रतिवद्धता जनाएका छन् ।
प्रतिक्रिया