काठमाडौं । राष्ट्रपति विद्यादेवी भण्डारीले गत शुक्रबार वितरण गरेको पदकमा लिम्पियाधुरा, लिपुलेक सहितको नयाँ नक्शा समावेश नगरिएको भन्दै नेकपा एमालेको माधव नेपाल पक्षका विद्यार्थीले प्रदर्शन गरेका छन् ।
नेपाल पक्ष निकटको अनेरास्ववियूले पदकमा अंकित नक्शामा नेपाली भूभाग गुमेको नक्सा राखिएको भन्दै काठमाडौंको माइतीघरमा लिपुलेक र लिम्पियाधुरासहितको नक्शासहित विरोध प्रदर्शन गरेका हुन् ।
नेपाली भूभाग समेटिएको नक्शा सहित प्रदर्शनमा उत्रिएका विद्यार्थीहरुले झूटो नक्शा चाहिन्न, चुच्चे नक्शा फेर्न पाइन्न, चुच्चे नक्शा खै जस्ता नारा लगाएका थिए । २०७६ सालमा घोषणा गरिएको विभिन्न विभूषण तथा पदक कारोना महामारीका कारण वितरण गर्न नसकिएको भन्दै राष्ट्रपति विद्यादेवी भण्डारीले गत शुक्रबार मात्र प्रदान गरेकी थिइन् ।
तर उक्त पदकमा लिपुलेक र लिम्पियाधुरासहितको नक्शा नभई नेपालको पुरानै नक्शा राखिएको थियो । सरकारले भने पदक घोषणा गत वर्ष भएकाले त्यही समयमा प्रचलनमा रहेको नक्शा राखेको बताउँदै आएको छ ।
१ वर्ष पछि प्रदान गरिएको पदकमा राज्यले थोरै खर्च गरेर नयाँ नक्शा समेटन सक्ने अवस्था रहेको भएपनि संवेदनशिल नभएको भन्दै सत्ता निकट एमाले कार्यकर्ताले समेत बिरोध जनाएका छन् । संसदबाट पारित भएर निशान छापमा समेत नयाँ नक्शा प्रयोगमा आउंदा राष्ट्रपतिबाट प्रदानित तक्मामा पुरानो नेपाली भूभाग बिनाको तक्मा वितरणले राष्ट्रियता प्रति ओली सरकारको वास्तविकता खुलेको प्रदर्शनामा सहभागी विद्यार्थीहरुले बताएका थिए ।
प्रतिक्रिया