काठमाडौं । नेपाली कांग्रेसका सभापति शेरबहादुर देउवासँग भेट गरेका एमाले वरिष्ठ नेता माधवकुमार नेपाल राष्ट्रपति भेट्न शितल निवास गएका छन् ।
एमाले पार्टीभित्रको अस्थिरता चरम अवस्थामा र देशकै अवस्था संकटमा पुगेको बेलामा नेता नेपालले आफ्नो कदमबारे जानकारी गराउन राष्ट्रपति विद्यादेवी भण्डारीसँग भेट गरेका हुन् । भण्डारी प्रधानमन्त्री केपी ओली निकट मानिन्छिन् ।
नेता नेपालसहित कांग्रेस, माओवादी केन्द्र र जनता समाजवादी पार्टीबीच ओली विरूद्ध गठबन्धन बनाउने विषयमा छलफल भैरहेको छ ।
बिहीबार साँझ नेता नेपाल र देउवाबीच करिब १ घण्टा छलफल भएको छ । दुवै नेताबीच समसामयिक राजनीतिक विषयमा छलफल भएको बताइएको छ । देउवासँग प्रधानमन्त्री ओलीले बुधबार भेट गरेका थिए ।
प्रतिक्रिया