काठमाडौं उपत्यकाको निषेधाज्ञा आजदेखि थप कडा, अत्यावश्यक बाहेकका सबै कार्यालय बन्द

खबर कुरा
३० बैशाख २०७८, बिहीबार
                 

काठमाडौं । काठमाडौं उपत्यकामा आजदेखि अत्यावश्यक बाहेकका सबै कार्यालयहरु बन्द हुनेभएका छन् ।

आजबाट जेठ १३ गतेसम्म थपिएको निषेधाज्ञामा अत्यावश्यक बाहेकका सबै कार्यालयहरु बन्द गर्ने निर्णय भएको हो ।

कोरोना भाइरसको संक्रमणको जोखिम झन बढ्दो क्रममा रहेका कारण निषेधाज्ञालाई कडा बनाउँदै थप गरिएको काठमाडौंका प्रमुख जिल्ला अधिकारी कालिप्रसाद पराजुलीले बताएका छन् । अत्यावश्यक सेवाका कार्यालयहरुले समेत न्यूनतम जनशक्तिमा सेवा प्रवाह गर्नेछन् ।

बुधबार बसेको उपत्यकाका तीनै प्रमुख जिल्ला अधिकारीहरुको बैठकले जेठ १३ गते राति १२ बजेसम्म निषेधाज्ञा थप गरेको थियो । अन्यावश्यक दैनिक उपभोग्य खाद्यवस्तुको खरिदका लागि पसलहरु बिहान १० बजेसम्म खुला हुनेछन् । यस्तै, सबैप्रकारको भीडभाड हुने गतिविधिमा रोक लगाइएको छ ।

आम सर्वसाधारणलाई खाद्यवस्तु र औषधी खरिदमा बाहेक अन्य प्रयोजनका लागि घरबाहिर हिँडडुल गर्न रोक लगाइएको छ । अत्यावश्यक सेवाका सवारी साधनहरु बाहेक अन्य सवारी साधनहरु जेठ १३ राति १२ बजेसम्म संचालनमा आउन पाउनेछैनन् । ढुवानी, बिरामी तथा कुरुवा (बढीमा दुई जना) बोकेका एम्बुलेन्स, स्वास्थ्यकर्मी तथा सुरक्षाकर्मीले प्रयोग गर्ने सवारी साधन भने सञ्चालन गर्न पाइनेछ ।

उपत्यकामा बैशाख १६ गतेदेखि बिहानदेखि निषेधाज्ञा सुरुभएको थियो । २२ गतेसम्मका लागि लगाइएको निषेधाज्ञालाई पछि २९ गतेसम्म लम्ब्याइएको थियो ।

यसमा तपाइको मत

Your email address will not be published. Required fields are marked *


*