कोभिड–१९ संकट व्यवस्थापन अध्यादेश, २०७८ कार्यान्वयनमा, निषेधाज्ञा उल्लंघन गर्ने भाटभटेनी स्टोरलाई ४ लाख जरिवाना

खबर कुरा
२४ जेष्ठ २०७८, सोमबार

काठमाडौं । निषेधाज्ञाको उल्लंघन गरेको भन्दै कोटेश्वरस्थित भाटभटेनी डिपार्टमेन्ट स्टोरलाई चार लाख जरिवाना गरिएको छ । निषेधाज्ञाको उल्लंघन गरी स्टोर खोलेको भन्दै जिल्ला प्रशासन कार्यालय काठमाडौंले भाटभटेनीलाई ४ लाख जरिवाना तोकेको हो ।

कोभिड–१९ संकट व्यवस्थापन अध्यादेश, २०७८ अनुसार स्थानीय प्रशासनको आदेश पालना नगरेको आरोपमा स्टोरसँग चार लाख रुपैयाँ जरिवाना गरिएको काठमाडौं प्रमुख जिल्ला अधिकारी कालीप्रसाद पराजुलीले बताए । हालै जारी भएको अध्यादेशमा व्यक्तिले निषेधाज्ञा उल्लंघन गरेमा एक लाख र संस्थाले उल्लंघन गरे पाँच लाखसम्म जरिवाना असुल्न सक्ने व्यवस्था गरिएको छ ।

निषेधाज्ञाको उल्लंघन गर्दै सोमबार दिउँसो भाटभटेनी संचालन गरेपछि कोटेश्वर शाखाका प्रबन्धक सागर गुरुङलाई प्रहरीले पक्राउ गरेको थियो । उपत्यकामा जारी निषेधाज्ञामा बिहान ९ बजेसम्म किराना पसल र डिपार्टमेन्ट स्टोर खोल्न पाउने आदेश गरिएको भएपनि दिनभर भाटभटेनी खुला रहेको सूचनाका आधारमा प्रशासनले अनुगमन गरेकोमा सो स्टोर खुल्ला रहेको पाईएपछि प्रबन्धक गुरुङलाई पक्राउ गरेको थियो ।

यसमा तपाइको मत

Your email address will not be published. Required fields are marked *


*