बुटवल । प्रतिनिधिसभा पुनर्स्थापना गर्ने र शेरबहादुर देउवालाई प्रधानमन्त्रीमा नियुक्त गर्न राष्ट्रपतिलाई परमादेश दिने सर्वोच्च अदालतको फैसला विरुद्ध एमालेका युवाले बुटवलमा प्रदर्शन गरेका छन् ।
एमालेको युवा संगठन युवा संघका कार्यकर्ताहरुले सर्वोच्चको फैसला विरुद्ध सडकमा प्रर्दशन गरेका हुन् ।
काठमाडौंमा एमाले युवा नेता महेश बस्नेतले फैसला विरुद्ध देशभर प्रदर्शनका लागि आफ्ना कार्यकर्ताहरुलाई आह्वान गरेलगत्तै बुटवलमा पनि उनी समर्थक युवा प्रदर्शनमा उत्रिएका हुन् ।
बुटवलको राजमार्ग चौराहमा भेलाभएका प्रदर्शनकारी युवाले ‘गैर संवैधानिक परमादेश खारेज गर’ भन्दै नारावाजी गरेका छन् ।
प्रहरीले फैसलाको विरुद्ध र समर्थनमा प्रदर्शन हुनसक्ने आंकलन गर्दै बिहानैदेखि सुरक्षा अवस्था कडा बनाएको थियो । प्रदर्शनका क्रममा राजमार्ग चौराह क्षेत्र लगायत बुटवलका विभिन्न स्थानमा प्रहरी परिचालन गरिएको छ ।
एमालेका युवाले काठमाडौंका विभिन्न स्थानमा गरेको प्रदर्शनमा प्रधानन्यायाधीस चोलेन्द्र शमशेर जबरा विरुद्ध नाराबाजी गरेका थिए ।
प्रतिक्रिया