कपिलवस्तुको बहादुरगञ्जको महामारी नियन्त्रण गर्न मुख्यमन्त्री केसीको निर्देशन

बुटवल । लुम्बिनी प्रदेश सरकारका मुख्यमन्त्री कुलप्रसाद केसी ‘सोनाम’ ले कपिलवस्तुको कृष्णनगर नगरपालिकाको बहादुरगञ्ज र आसपासका क्षेत्रमा फैलिएको झाडापखालाको महामारीलाई तुरुन्त नियन्त्रण गर्न स्वास्थ्य मन्त्रालायलाई निर्देशन दिएका छन् ।

आज विहानदेखी फैलिएको झाडापखाला प्रकृतिको महामारीको समस्या नियन्त्रण आउन नसकेपछि तुरुन्त नियन्त्रणका लागि ठोस कदम चाल्न स्वास्थ्य मन्त्रालयलाई निर्देशन दिएका हुन् ।

कपिलबस्तु बहादुरगञ्जका आसपासका देवानगिया, जमुनी, सुखरामपुर, दयानगर, बभनपुरवा, जुमिला, विजयनगर लगायतका गाउँहरुमा रातिदेखि नै हैजाका विरामी फेला परेको बताईएको छ । महामारीको जानकारी पाए लगत्तै मुख्यमन्त्री केसीले स्वास्थ्य मन्त्रालयका सविच डा. विकास देवकोटालाई बोलाएर रोकथामका लागि निर्देशन दिएका हुन् । उनले त्यस क्षेत्रको रोगको पहिचान, उपचारका लागि कुनै पनि कमी हुन नदिनका लागि स्वास्थ्य सचिव देवकोटालाई निर्देशन दिएका थिए ।

मुख्यमन्त्रीको निर्देशनसँगै प्रदेश मन्त्रालयले रुपेन्देही र कपिलवस्तुबाट चिकित्सक सहितको टोलि परिचालन गरिएको स्वाथ्य मन्त्रालयको सचिव देवकोटाले जानकारी दिए । देवकोटाले गम्भिर विरामीहरुलाई लुम्बिनी प्रादेशिक अस्पताल र कपिलवस्तु अस्पतालमा उपचारको व्यवस्था मिलाईएको बताए ।

मन्त्रालयले पानीका कारण हैजा पैलिएको अनुमान गरेको छ । बुधबारसम्म महामारी नियन्त्रण हुने समेत मन्त्रालयले दाबी गरेको छ ।
शिवराज अस्पतालमा बिरामीको चाप बढेपछि निजि क्लिनिकमा उपचार गराईरहेका ३ जना झाडापखालाका विरामीको आजै मृत्यु भएको थियो ।