रोहिणी खोलामा पुलबाट बस खस्यो, ९ जनाको मृत्यु

खबर कुरा
२२ जेष्ठ २०७९, आईतवार
                 

बुटवल । रुपन्देहीको रोहिणी खोलामा यात्रुवाहक बस पुलबाट खसेर दुर्घटनाग्रस्त भएको छ । जनकपुरबाट भैरहवाका लागि छुटेको लु२ख ३८४१ नम्बरको बस बिहान ४ः३० बजे भैरहवा–परासी सडक खण्ड अन्तर्गत रोहिणी पुलबाट खोलामा खसेको हो ।

पुलबाट खोलामा बस खस्दा बसमा सवार नौ जनाको मृत्यु भएको र २३ जना यात्रु घाइते भएको प्रहरीले जनाएको छ ।

उपचारको क्रममा पाँच जनाको भैरहवास्थित मेडिकल कलेज र चार जनाको भीम अस्पतालमा मृत्यु भएको जिल्ला प्रहरी कार्यालय भैरहवाका प्रहरी नायव उपरीक्षक एवं रुपन्देही प्रहरी प्रवक्ता नवरत्न पौडेलले जानकारी दिए । प्रहरीले मृतकको सनाखत गर्ने प्रयास गरिरहेको छ ।

गुडिरहेको अवस्थामा चालक निदाएका कारण बसले रोहिणी पुलको रेलिङ तोड्दै खोलामा खसेको प्रहरीले प्रारम्भिक अनुमान गरेको छ ।

तीनवटा जेसीभीको प्रयोग गरेर दुर्घटनामा परेको बसलाई सुल्टो बनाएर यात्रुको उद्धार गरिएको ट्राफिक प्रहरीले जनाएको छ ।

यसमा तपाइको मत

Your email address will not be published.


*