काठमाडौं । एकीकृत समाजवादी अध्यक्ष माधवकुमार नेपालले चुनाव जित्न गठबन्धनको भर नपर्न नेता कार्यकर्ताहरुलाई निर्देशन दिएका छन् ।
काठमाडौंमा बुधबार केन्द्रीय पार्टी स्कूल विभागले गरेको स्थानीय तहमा निर्वाचित जनप्रतिनिधिहरुको अभिमुखीकरण कार्यक्रमलाई सम्बोधन गर्दै अध्यक्ष नेपालले चुनाव आफ्नै बल बुतामा जित्नुपर्ने बताएका हुन् । गठबन्धनको भर पर्दा अर्काले जिताइदेला भन्ने भर पर्ने बताउँदै नेपालले आफ्नै पहलमा पार्टी संगठन बलियो बनाएर चुनाव जित्नुपर्ने बताए ।
अध्यक्ष नेपालले आफ्नो पार्टीबाट निर्वाचित स्थानीय तहका जनप्रतिनिधिलाई आफ्नो पालिकामा भएका समस्या नोट गरेर समाधानको बाटोमा लाग्न निर्देशन दिए । उनले आफ्नो पालिकामा भएका समस्यालाई नोट गरेर प्राथमिकताका आधारमा समस्या समाधान गर्न पनि निर्देशन दिए ।
शिक्षा, स्वास्थ्य, खानेपानीदेखि पौष्टिक आहारको व्यवस्थालाई ध्यान दिन निर्देशन दिँदै उनले सिँचाइललगायतका भौतिक पूर्वाधारका क्षेत्रमा काम गर्न निर्देशन दिए ।
केन्द्र सरकारसँँग पहुँच बढाउन पनि आग्रह गरेका अध्यक्ष नेपालले आफ्नो पालिकाको विकास र समृद्धिका लागि योजनावद्ध ढंगले अघि बढ्न निर्देशन दिए ।
प्रतिक्रिया