काठमाडौं । नेपाल मजदुर किसान पार्टीले एशिया महादेश र विश्वमा अमेरिकाले अशान्ति फैलाइरहेको भन्दै विरोध गरेको छ ।
नेमकिपाले आज एक विज्ञप्ति प्रकाशित गर्दै अमेरिकाले चीनलाई उत्तेजित बनाएर एसियामा अशान्ति फैलाउने र युद्ध थोपर्ने चालबाजी गरिरहेको आरोप लगाएको हो । विज्ञप्तिमा नेमकिपा अध्यक्ष नारायणमान विजुक्छेले अमेरिकी सभामुखले ताइवानको भ्रमण गरेर चीनलाई उत्तेजित बनाएको भन्दै विरोध गरेका छन् । ताइवान चीनको अभिन्न अंग भएको भन्दै अध्यक्ष विजुक्छेले अमेरिकी सभामुखले त्यहाँ गएर उत्तेजनात्मक गतिविधि गरेको आरोप लगाएका छन् ।
विजुक्छेले भनेका छन्, ‘चिनियाँ भूमिमा अस्थिरता फैलाउने, ताइवानमा क्रियाशील विखण्डनकारी संगठनलाई पोस्ने, दक्षिणी चीन सागरमा उत्तोजनात्मक गतिविधि गर्ने र चीनविरुद्ध शीत युद्धको अभ्यास गर्दै आएको सर्वविदित छ । त्यसैको सिलसिला अन्तर्गत पेलोसीको ताइवान भ्रमण भएको प्रष्ट छ, निश्चय पनि यसको परिणाम वाइडेन प्रशासनले भोग्नुपर्नेछ भन्ने चिनियाँ घोषणा देशभक्तिपूर्ण छ ।’
नेमकिपाले अमेरिकाले एक चीन नीतिलाई स्वीकार गरे पनि व्यवहारमा चिनियाँ मुख्य भूमिबाट ताइवानलाई अलग बनाउने षड्यन्त्र गरिरहेको आरोप समेत लगाएको छ ।
प्रतिक्रिया